ҚазТАГ агенттігінің хабарлауынша: «Қазақстан 2027 жылы мұнай өндіру көлемін арттыруды жоспарлап отыр. Бұл туралы энергетика министрі Ерлан Ақкенженов мәлімдеді. «Әзірге (2026 жылы – ҚазТАГ) жоспарға сай жұмыс істеп жатырмыз. Биыл 96 млн тонна мұнай өндіру көзделген. Келесі жылдың көрсеткішін қазір нақтылап жатырмыз. Менің ойымша, шамамен 99 млн тонна болады», – деді министр Үкіметте өткен баспасөз мәслихатында. Мұнай өндіру көлемі арта ма деген сұраққа министр оң жауап берді. Еске сала кетейік, Қазақстан бастапқыда 2026 жылы 100 млн тонна мұнай өндіруді жоспарлаған болатын. Алайда Каспий құбыр консорциумына (КҚК) жасалған шабуылдарға байланысты бұл көрсеткіш кезең-кезеңімен қайта қаралып, 96 млн тоннаға дейін төмендетілді».
Еуразия24 пікірі:
Энергетика министрінің мәлімдемесі ОПЕК+ ұйымының 1 қарашадағы шешімімен салыстырғанда біршама күтпеген жаңалық болып отыр. Қазақстанды қоса алғанда, альянсқа мүше жеті ел 2026 жылғы желтоқсанда мұнай өндіруге қойылған қолданыстағы шектеулерді сақтауға келісті. Қазақстан үшін тәуліктік өндіріс көлемі 1,628 млн баррель болып белгіленген. Оның үстіне еліміз бұған дейін келісілген өндіріс көлемінен бірнеше рет асып, артық өндірілген мұнай көлемін алдағы уақытта қысқартуға міндеттеме алған болатын.
Мұнда бір маңызды жайт бар. ОПЕК+ әзірге 2027 жылға арналған мұнай өндіру квоталарын бекіткен жоқ. Бұл мәселе 29 қарашада келісімге қатысушы елдердің өндірістік мүмкіндіктері бағаланғаннан кейін талқыланады.
Сондықтан Қазақстанның 2027 жылы мұнай өндіруді арттыру жоспары әзірге ОПЕК+ ұйымының соңғы шешіміне ресми түрде қайшы келмейді. Дегенмен жоспарланған 99 млн тонна мұнай өндірісінде айтарлықтай серпіліс болатынын білдірмейді. Өйткені 2026 жылы Каспий құбыр консорциумына жасалған шабуылдар мен Теңіз кен орнындағы техникалық ақаулар салдарынан мұнай өндіру көлемі қысқарған еді. Демек, келесі жылы Қазақстан мұнай өндірісін бұрын қол жеткізген деңгейге қайта жеткізумен ғана шектелмек.
