Қазақстан Республикасы Сауда және интеграция министрлігінің хабарлауынша, 2025 жылдың 7 шілдесінде АҚШ Президентінен ресми хабарлама келіп түсті. Құжатқа сәйкес, 2025 жылғы 1 тамыздан бастап бірқатар елдерден келетін импортқа жаңа кедендік баж салығы енгізіледі. Бұл тізімге Қазақстан да кіреді.
Атап айтқанда, АҚШ нарығына Қазақстаннан жеткізілетін тауарларға бірыңғай 25 пайыздық импорттық тариф белгіленген. Алайда, жаңа шаралар қазақстандық экспорттың басым бөлігіне әсер етпейді. Стратегиялық маңызы бар мұнай, уран, күміс, ферроқорытпа, тантал және титан секілді негізгі шикізат өнімдері тарифтік шектеулерден босатылған. Сарапшылардың бағалауынша, бұл шешім Қазақстаннан АҚШ-қа бағытталған экспорттың шамамен 95 пайызына қатысты болмайды.
Қазақстан Үкіметі сауда қатынастарының ашықтығы мен болжамдылығын сақтау мақсатында Ақ үй әкімшілігіне нақты ұсыныстар жолдады. Бұл бастамалар өзара сауда шарттарын жетілдіруге бағытталған. Қазіргі уақытта АҚШ тарапы бұл ұсыныстарды қарап жатыр және келіссөздер күнін қосымша хабарлайтын болады. Қазақстан ұлттық мүддені қорғап, тұрақты сауда-экономикалық серіктестікті дамыту үшін диалогты жалғастыруға дайын.
Евразия24 пікірі:
Қазақстандық дипломаттардың кәсібилігіне тәнті болуға болады. Ақ үйден келген әрбір хабарламаға АҚШ-пен өзара тиімді ынтымақтастық орнату үшін келіссөздер жүргізудің қажеттілігін алға тарта отырып жауап береді.
Сауда және интеграция министрлігінің мәліметіне сәйкес, 2025 жылдың қаңтар–мамыр айларында Қазақстан мен АҚШ арасындағы тауар айналымы 1,265 миллиард долларды құрады. Оның ішінде қазақстандық экспорт 418,2 миллион доллар болды. Демек, Қазақстан Америкадан көбірек тауар импорттайды, бұл өз кезегінде тараптардың нарықтағы өзара тәуелділігін көрсетеді.
Айта кету керек, ұқсас ескерту хаттарды АҚШ басқа да бірқатар мемлекеттерге – Оңтүстік Корея, Жапония, Лаос, Мьянма, Малайзия, ОАР, Тунис, Индонезия, Бангладеш, Сербия, Камбоджа, Таиланд, Босния және Герцеговина – жолдаған. Сарапшылардың пайымынша, бұл жаппай жіберілген техникалық сипаттағы хабарламалар болуы мүмкін. Нақты шарттар мен тарифтік өзгерістер 1 тамызға дейін екіжақты форматта талқылануы ықтимал.
