Астана. 29 шілде. ИНТЕРФАКС-ҚАЗАҚСТАН – Түркияның ірі құрылыс компанияларының бірі – YDA Holding Астана қаласында сэндвич-панель өндіретін зауыт, сондай-ақ Ақтау қаласында мульти модальды транзиттік хаб салуды жоспарлап отыр. Бұл туралы Мемлекет басшысының баспасөз қызметі хабарлады.
Қазақстан Президенті Қасым-Жомарт Тоқаев Түркияға ресми сапары аясында YDA Holding директорлар кеңесінің төрағасы Хүсейін Арсланмен кездесу өткізді. Кездесу барысында Арслан компанияның Қазақстандағы инвестициялық қызметі жөнінде баяндап, алдағы жоспарларымен бөлісті.
«Жақын арада компания YDA Industrial Park кешенді өндірістік алаңын кеңейтуге және Астанада сэндвич-панель шығаратын зауыттың құрылысын бастауға ниетті», – делінген кездесу қорытындысына арналған ресми хабарламада.
Сонымен қатар, YDA Holding басшысы Ақтау қаласында мультимодальды көлік-логистикалық хаб құру жоспары жөнінде Президентке мәлімет берді.
Президенттің баспасөз қызметі атап өткендей, бүгінде аталған түркиялық холдинг еліміздің Түркістан, Астана және Петропавл қалаларында көпбейінді ауруханалар салу және оларды пайдалану бойынша үш жобаны іске асырып жатыр.
YDA Holding – құрылыс саласына маманданған әртараптандырылған компаниялар тобы. Холдинг Қазақстан нарығында 2002 жылдан бері жұмыс істеп келеді. Осы уақыт ішінде жалпы құны 320 миллион АҚШ долларына тең үш ірі жобаны жүзеге асырды. Олардың қатарында Ақтау және Түркістан қалаларындағы халықаралық әуежайлар құрылысы, сондай-ақ «Астана-Технополис» арнайы экономикалық аймағында орналасқан YDA Industrial Park өндірістік кешені бар.
