Forbes.kz порталы хабарлағандай, Қазақстан Республикасы Премьер-министрінің бірінші орынбасары Роман Скляр елімізде салынуы жоспарланып отырған үшінші атом электр станциясына қатысты мәлімдеме жасады. «Үшінші атом электр станциясын Қытай салатын болады. Қазіргі таңда Атом энергетикасы агенттігі мен «Қазақстандық атом электр станциялары» ЖШС мамандары болашақ АЭС-тердің орналасатын орындарын айқындау бойынша жұмыс жүргізіп жатыр. Станциялардың орналасатын жерлері бойынша шешім осы жылдың соңына дейін жария етіледі деп жоспарлануда. Сонымен қатар, барлық тараптармен тиісті келісімдер жасалуда», – деді Роман Скляр. Сондай-ақ, үшінші АЭС-тің құрылысын Қытайдың CNNC компаниясы жүргізетіні туралы сұраққа оң жауап берді. Айта кетейік, бұл компания еліміздегі екінші атом электр станциясының құрылысына да жауапты.
Евразия24 пікірі:
Қазақстанда екінші және үшінші атом электр станцияларын салу бойынша мердігер ретінде қытайлық компанияны таңдау себебін Атом энергетикасы агенттігінің төрағасы Алмасадам Сәтқалиев 2025 жылғы маусымда түсіндірді. Сол кезде Қазақстанда алғашқы атом электр станциясын «Росатом» салады деп хабарланған болатын. «Әлемде атомдық циклдің толық кезеңін өз күшімен орындай алатын елдер көп емес. Қытай – қажетті технологиялар мен өндірістік-индустриялық базаға ие елдердің бірі. Сондықтан келесі басым бағытымыз – Қытаймен ынтымақтастық», – деді ол.Сондай-ақ, Қытай қазіргі уақытта әлем бойынша ең көп атом электр станциясын салып жатқан мемлекет. Елде 28 станцияның құрылысы жүргізілуде, 57 станция іске қосылған. Өзінің алғашқы реакторын Қытай 34 жыл бұрын іске қосқан.
