Алматы қаласының әкімдігі мәлімдейді: «Бағанашыл» балалар үйінің тәрбиеленушілері өздерінің орталығында тұрып, Алматы қаласында білімалуды жалғастырады. Қазіргі уақытта Алматы қаласы мен Алматы облысының әкімдіктері нысанды беру жұмыстарын жүргізіп жатыр. Балаларға заманауи және қауіпсіз жағдай жасау мақсатында мекеме ғимаратына кешенді жөндеу жұмыстарын жүргізу жоспарланған. Аталған жұмыс техникалық сараптама, жобалық-сметалық құжаттама әзірлеу, мемлекеттік сараптама және конкурстық рәсімдердің қажеттілігіне байланысты келесі жылы басталады. Балалар үйінің тәрбиеленушілерін Қонаев қаласына көшіру жоспарда жоқ. Балалардың қауіпсіздігі мен қолайлы өмір сүру жағдайларын қамтамасыз ету – Алматы қаласы әкімдігі мен Оқу-ағарту министрлігінің басты назарында. Тәрбиеленушілердің білім алуы мен тұрмыстық жағдайы бақылауда.»
Евразия24 пікірі:
21 шілде күні Алматы облысына «ерікті түрде» көшуге мәжбүр болған Бағанашылдағы балалар үйінің тәрбиеленушілеріне қатысты жағдай ел Президентінің тапсырмасы мен Президент Әкімшілігі жүргізген тексерістен кейін өз шешімін тапты. Жетім балаларды өз мекенінде қалдыру – аталған оқиғаның қисынды әрі әділ қорытындысы болды.
Бұл тақырыпқа қатысты «Еуразия24» порталы бұрынғы бала құқықтары жөніндегі уәкіл Аружан Саинмен сұхбат дайындады. Ол балалар үйінің жабылуына қатысты бастаманы жер телімінің жоғары нарықтық құнымен байланыстырады.
Мәжіліс депутаты Бақытжан Базарбек те бұл учаскенің коммерциялық мақсатқа өту ықтималдығына құқықтық баға беріп: «Егер балалар көшірілсе, бұл жердің мәртебесі қандай болады? Егер мақсатты қолданылуы өзгеріп, коммерциялық құрылыс салынса – бұл мемлекеттің жер пайдалану құқығының бұзылуы болмақ», – деді. Соған қарамастан, балалар үйі орналасқан жердің құны төмендеген жоқ. Бағанашылда орнаған тыныштық қанша уақытқа созылатыны белгісіз.
