Астана. 1 тамыз. ИНТЕРФАКС-ҚАЗАҚСТАН – Қазақстан транзиттік әлеуеті жоғары мемлекет ретінде көлік саласын заманауи және бәсекеге қабілетті деңгейде дамытуы қажет. Бұл туралы Мемлекет басшысы Қасым-Жомарт Тоқаев көлік қызметкерлерін кәсіби мерекесімен құттықтау барысында мәлімдеді.
«Көлік жүйесі – экономиканың қозғаушы күші, ілгерілеу мен өркендеудің кепілі деуге толық негіз бар. Біздің еліміз бұл салада орасан зор, тіпті бірегей транзиттік әлеуетке ие. Қазақстан – Еуразия кеңістігіндегі басты транзиттік тораптардың бірі», – деді Президент.
Мемлекет басшысының сөзін Ақорданың баспасөз қызметі таратты.
Тоқаевтың айтуынша, еліміз өзінің аумағы арқылы өтетін көлік дәліздерінің инфрақұрылымын жаңғыртуды кезең-кезеңімен қолға алған.
«Логистикалық хабтар мен қоймалар ашылып жатыр, теміржол бағыттарының құрылысы белсенді түрде жүргізілуде. Мұндай ауқымды шаралар еліміздің сыртқы сауда көлемін арттырып қана қоймай, экономикалық өсімге де серпін береді деп сенемін», – деді Президент.
Оның айтуынша, көлік саласы алдыңғы қатарлы, заманауи әрі жаһандық деңгейде бәсекеге қабілетті болуы тиіс.
