Вашингтон. 5 тамыз. ИНТЕРФАКС – АҚШ Нидерландтарға Украинаға жіберу үшін құны 578 миллион доллар болатын қару-жарақ пен оқ-дәрілер партиясын сатты. Бұл туралы АҚШ-тың НАТО жанындағы тұрақты өкілі Мэттью Уитакер Bloomberg агенттігіне берген сұхбатында хабарлады.
Оның айтуынша, бұл келісім НАТО мен АҚШ арасындағы, альянс елдерінің Украина үшін америкалық қару-жарақ сатып алуына қатысты уағдаластықты жүзеге асырудағы «алғашқы қадам» болып табылады. Уитакер Нидерландтың бастамасын басқа мемлекеттер де қолдайды деген үмітін білдірді. Бұл елдер Украинаға Patriot зениттік-зымыран кешендеріне арналған зымырандар, артиллериялық снарядтар, оқ-дәрілер мен жабдықтар жеткізе алады.
Бұған дейін Нидерландтың қорғаныс министрі Рубен Брекелманс елінің НАТО мүшелері арасынан бірінші болып Украинаға құны 500 млн еуро болатын америкалық қару-жарақ жөнелтетінін растады.
«Нидерланд НАТО-ға мүше елдердің ішінде бірінші болып Украинаға Patriot жүйелеріне арналған зымырандар мен бөлшектерді қоса алғанда, америкалық қару-жарақ жеткізеді. Жалпы сома – 500 млн еуро», – деп жазды министр Х әлеуметтік желісіндегі парақшасында.
Еске салсақ, АҚШ президенті Дональд Трамп 11 шілдеде НАТО одақтастары Вашингтоннан қару-жарақ сатып алып, кейін оны Украинаға жеткізе алатынын мәлімдеген болатын. Германия мен бірнеше скандинавиялық мемлекеттер АҚШ-тан қару сатып алуға ресми келісімін берді.
