Еуразиялық экономикалық комиссия (ЕЭК) Кедендік-тарифтік және тарифтік емес реттеу департаменті директорының орынбасары Аскат Бековтың мәліметінше, қазіргі таңда Ресей Федерациясында тұтынушыларға арналған «Честный знак» мобильді қосымшасы қолданыста. «Аталған қосымша арқылы тұтынушы QR-кодты сканерлеп, тауар жөнінде толық ақпарат ала алады. Одаққа мүше өзге мемлекеттерде де осыған ұқсас сервистерді әзірлеу жұмыстары жүргізіліп жатыр», – деді ол. ЕЭК мәліметінше, тауарларды міндетті цифрлық таңбалау жүйесі тұтынушылардың қауіпсіздігі мен сапалы өнімге қол жеткізуін қамтамасыз ету мақсатында кеңейтіліп келеді. Комиссия бұл үдерісті белсенді түрде қолдап отыр. 2019 жылдан бері Еуразиялық экономикалық одақ кеңістігінде таңбаланған тауарлар саны шамамен 274 миллиард бірлікті құрады.
Евразия24 пікірі:
5 тамыз күні өткен Үкімет отырысында Премьер-Министр Олжас Бектенов Сауда және интеграция министрлігінің тауарларды цифрлық таңбалау жүйесінің маңыздылығы мен тиімділігі жөнінде кәсіпкерлік субъектілеріне ақпараттық-түсіндіру жұмыстарын жеткілікті деңгейде жүргізбей отырғанын сынға алды. «Тауарларды цифрлық таңбалау» жобасы – отандық нарықты контрафактілік және сапасыз өнімдерден қорғауға, сонымен қатар отандық өндірушілердің бәсекеге қабілеттілігін арттыруға бағытталған бастама», – деді Үкімет басшысы. Сонымен қатар, Премьер-Министрдің тапсырмасына сәйкес елімізде Ұлттық тауарлар каталогы құрылатын болды. Сапалы өнім үшін күрес – сөзсіз, қажетті шара. Алайда қазіргі таңда мемлекет азық-түлік инфляциясымен күрес жүргізіп жатқан жағдайда, таңбалауға қойылатын жаңа талаптар өндірушілерге қосымша шығын болып жүктелмей ме? Жалпы алғанда, жағдай күрделі – ЕАЭО аясындағы таңбалау бойынша міндеттемелерді орындау қажет, сонымен бірге ішкі нарықты бағаның өсуінен қорғау да маңызды міндет болып отыр.
