Президент жанындағы Орталық коммуникациялар қызметі хабарлайды: «Мемлекет басшысы кәсіпкерлердің құқықтарын қорғау жөніндегі уәкіл Қанат Нұровты қабылдады. Ол кәсіпкерлердің құқықтарының бұзылуына байланысты түскен 3 275 өтініштің ішінен 1 759-ы (53,7%) бойынша оң шешім қабылданғанын мәлімдеді. Бизнес үшін алдын алынған шығынның жалпы көлемі 20 млрд теңгеден асты. Жалпы алғанда, өтініштер саны 12%-ға төмендеді, бұл әкімшілік әділет институтының тиімділігімен байланысты. Қасым-Жомарт Тоқаев кәсіпкерлердің құқықтарын қорғау шараларын оданәрі күшейтудің маңыздылығын атап өтіп, Кәсіпкерлікті қорғау стратегиясын іске асыру аясында жүйелі мәселелерді шешуге бағытталған бірқатар тапсырма берді».
Евразия24 пікірі:
Қазақстанда бизнес-омбудсмен институты 2016 жылы 19 ақпанда құрылған. Яғни, алдағы уақытта бұл құрылымның құрылғанына 10 жыл толмақ. Ең маңыздысы – бизнес-омбудсмен институтын құру жөніндегі бастаманы бизнес қауымдастықтың өзі ұсынды. Өйткені жергілікті деңгейде жобаларды қасақана созбалаңға салған лауазымды тұлғалармен күрес көбіне нәтиже бермей, басталмай жатып сәтсіз аяқталатын. Бизнес-омбудсмен институтынан бөлек, қазіргі уақытта әкімшілік әділет жүйесі де кәсіпкерлердің мемлекетпен сот дауларында айтарлықтай қолдау көрсетіп келеді. Алайда Қанат Нұровтың Президентке ұсынған қысқаша есебінен ел аумағында кәсіпкерлердің құқықтары 1 759 жағдайда нақты кім бұзғанын анықтау мүмкін емес. Әрбір заң бұзушылықтың артында нақты тұлғаның аты-жөні мен лауазымы тұр. Бұл ақпаратты жарияламау орынсыз, өйткені қоғамдық айыптау болашақтағы құқық бұзушылықтардың алдын алуда тиімді құрал екені тәжірибеде дәлелденген.
