Жоғары аудиторлық палата хабарлауынша, “Қазақстан Даму Банкі” АҚ 2028 жылға дейінгі даму жоспарында қарыз алу саясатының ашықтығы мен болжамдылығын арттыру бойынша шаралар қабылдады. Аталған жұмыс Жоғары аудиторлық палатаның тапсырмасы бойынша жүргізілді. Биыл Жоғары аудиторлық палата “Бәйтерек” ұлттық басқарушы холдингі” АҚ мен оның еншілес ұйымдарында қарызды басқару тиімділігін тексерді. Нәтижесінде, “ҚДБ” АҚ-ның қарыз алу саясатының стратегиялық бағыттары даму жоспарында толық көрініс таппағаны анықталды. Сондай-ақ, шартты қарыз алу үлесінің өсуін және банктің қарыздық бағалы қағаздарының әртараптандырылу деңгейін бағалайтын нақты сандық өлшемдер бекітілмеген. Бұл жағдай қарызды басқару ашықтығы мен тиімділігін төмендетуі мүмкін еді. Осыған байланысты “ҚДБ” АҚ басшылығына 2024–2028 жылдарға арналған даму жоспарында қарыз алу саясатының стратегиялық бағыттарын толық қамтуды, соның ішінде оларды іске асыруға қажетті көрсеткіштерді енгізуді қамтамасыз ету тапсырылды. Тиісті өзгерістер енгізіліп, ағымдағы жылы 27 маусымда Директорлар кеңесінің шешімімен бекітілді.
Евразия24 пікірі:
Мемлекеттік басқару және квазимемлекеттік сектор жұмысының кейбір қырлары түсініксіз болып көрінеді. Қызметті жетілдіру қадамдары, әдетте, Жоғары аудиторлық палатаның ауқымды тексерістері мен олардың қорытындысы бойынша берілетін ұсынымдардан кейін ғана қолға алынатындай әсер қалдырады. Не себепті бұл өзгерістерді мемлекеттік аудиттің нұсқауын күтпестен, дер кезінде енгізіп, қажетті құжаттарды қабылдауға болмайды? Мүмкін, проблемалық бағыттарды уақтылы талдап, шешу жолдарын әзірлейтін жауапты құрылымдар қалыптаспаған шығар. Ал жауапкершілік жүктелмеген жағдайда, мұндай жұмыстарға қызығушылық та төмен болады. Егер бюджетке зиян келтірген ашық емес әрі күмәнді рәсімдер үшін бірінші басшылардың бұлтартпас жауапкершілігі заңмен бекітілсе, оларға қарсы іс-қимыл да жүйелі әрі мақсатты болар еді. Мұндай жағдайда тиісті шара «аудиторлар талап еткендіктен» емес, шынайы қажеттілік үшін қабылданар еді.
