Kazinform хабарлайды: «Қазақстан өнеркәсіпке арналған жасанды интеллект әзірлеуге қатыса алады – британдық басылым. Жасанды интеллект Қазақстанның ақпараттық технологиялар саласын ғана емес, экономиканың негізгі салаларын да өзгерте алады. ЖИ негізіндегі технологиялар жабдықтарды басқаруға, геологиялық деректерді талдауға, энергетикалық нысандардың жұмысын болжауға және өндірістік үдерістерді автоматтандыруға мүмкіндік береді. Бұл туралы Ұлыбританияның халықаралық қаржы-талдау басылымы Global Banking & Finance Review жазады. «Тау-кен өнеркәсібі дамыған, аграрлық секторы ауқымды әрі транзиттік әлеуеті бар ел үшін бұл бағыт айрықша мүмкіндіктер ашады. Қазақстан дайын технологияларды сатып алумен шектелмей, өзі тәжірибе жинақтаған және өндірістік базасы қалыптасқан салаларға арналған технологиялық шешімдерді әзірлеуге де қатыса алады», – делінген жарияланымда».
Еуразия24 пікірі:
Британдық сарапшылар мақтау сөзін аямағанымен, олардың оң бағасына негіз бар. Әсіресе NVIDIA басшысы Дженсен Хуангтың Қазақстанға сапарынан кейін мұндай сенім нығая түсті.Әмбебап нейрожелілер жасау ісінде АҚШ пен Қытаймен бәсекеге түсуіміз міндетті емес. Ал еліміз мол тәжірибе жинақтаған мұнай өндіру, металлургия, геологиялық барлау және энергетика салаларына арналған мамандандырылған ЖИ технологияларын әзірлеудің келешегі зор. Бұл бағытта алғашқы нәтижелер де бар.
Өнеркәсіп және құрылыс министрлігінің мәліметінше, жасанды интеллектіні енгізудің 2025–2026 жылдарға арналған жол картасы 11 ірі кәсіпорындағы 41 жобаны қамтиды. Мәселен, ERG MES цифрлық платформасының экономикалық тиімділігі қазірдің өзінде шамамен 1,5 млрд теңгені құраған. Ал 2026 жылғы сәуірде энергетика министрі Ерлан Ақкенженов 4 мыңнан астам мұнай ұңғымасының жұмысын бақылайтын қазақстандық ЖИ жүйесін АҚШ-қа экспорттауға дайындап жатқанын хабарлады.
