АСТАНА. 3 қыркүйек. ИНТЕРФАКС-ҚАЗАҚСТАН – Қазақстан Республикасы Парламенті Мәжілісінің жалпы отырысында «Қазақстан Республикасының Үкіметі мен Армения Республикасының Үкіметі арасындағы көші-қон саласындағы ынтымақтастық туралы келісімді ратификациялау туралы» заң қабылданды.
Аталған келісім 2024 жылғы сәуірде Ереван қаласында қол қойылып, екі мемлекет арасындағы көші-қон саласындағы өзара іс-қимылды көздейді. Құжатта бір тарап азаматтарының екінші тарап аумағындағы құқықтарын қорғау, сондай-ақ ақпараттық өзара іс-әрекет тетіктері қарастырылған. Барлық шаралар тараптардың ұлттық заңнамасына және халықаралық міндеттемелеріне сәйкес жүзеге асырылатын болады. Бұл туралы Мәжілістің заңнама және сот-құқықтық реформа комитетінің қорытындысында айтылған.
Құжатты депутаттарға таныстырған Ішкі істер министрі Ержан Саденовтың айтуынша, келісімді ратификациялау қос азаматтықпен күрес тиімділігін арттыруға, заңсыз көші-қон арналарының жолын кесуге, көші-қон саласындағы жедел ақпарат алмасуды жолға қоюға мүмкіндік береді. Қабылданған заң енді Парламент Сенатының қарауына жіберілді.
