АСТАНА. 10 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев ТМД мемлекеттері басшыларының Душанбеде өткен кеңесінде креативті индустрияларды дамыту мақсатында жаңа бірлестік құруды ұсынды.
«ТМД-ның Гуманитарлық ынтымақтастық жөніндегі мемлекетаралық қоры аясында Креативті индустриялар қауымдастығын құруды ұсынамын. Қауымдастықтың негізгі миссиясы – жастардың шығармашылық әлеуетін қолдау, бірлескен жобаларды іске асыру және креативті экономиканың экожүйесін қалыптастыру болуы тиіс», – деді Мемлекет басшысы.
Президент креативті индустриялардың дамуын қолдаудың маңыздылығын атап өтті, себебі бұл сала дәстүр мен инновацияны, тарихи мұра мен заманауи технологияларды ұштастырады.
«Қазақстан да бұл бағытта нақты қадамдар жасап жатыр. Қазіргі таңда еліміздегі креативті сектордың қосымша құны 2 млрд доллардан асты, ал бұл салада 143 мың адам жұмыспен қамтылған», – деді Тоқаев.
Мемлекет басшысы креативті индустриялардың айтарлықтай экономикалық әсері бар екенін айтып, оларды мәдени дипломатияның тиімді құралы деп бағалады. Бұл құрал мемлекеттер арасындағы достық пен тату көршілік байланыстарын нығайтуға қызмет етеді.
«Бұл саладағы ТМД елдерінің әлеуеті зор», – деп түйіндеді Қасым-Жомарт Тоқаев.
