АСТАНА. 10 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев ТМД-ға мүше мемлекеттердің ортақ мақсаты – ұйымды жаңа мүмкіндіктер кеңістігіне айналдыру екенін мәлімдеді.
«Бізді біріктіретін ортақ мақсат – ТМД-ны жасампаздық пен ілгерілеудің, тың идеялар мен жаңа мүмкіндіктердің кеңістігіне айналдыру. Ортақ күш-жігерімізбен ТМД-ны болашаққа бағытталған, тиімді әрі серпінді халықаралық ұйым ретінде нығайта алатынымызға сенімдімін», – деді Мемлекет басшысы Тәжікстан астанасы Душанбеде өткен ТМД саммитінде.
Президент Тоқаев Шанхай ынтымақтастық ұйымына ТМД жанындағы байқаушы мәртебесін беру туралы саммитте қабылданатын шешім еуразиялық өңірлік құрылымдар арасындағы өзара іс-қимыл тарихында жаңа парақ ашатынын атап өтті.
Сондай-ақ Мемлекет басшысы Қазақстанның Мәскеудегі саммит барысында ұсынған «ТМД плюс» өзара іс-қимыл форматын құру бастамасы жүзеге асырылып жатқанын айтып, бұл қадам ТМД-ның халықаралық аренадағы рөлін арттыратынына сенім білдірді.
