Мадрид. 11 қазан. ИНТЕРФАКС – Палестинаның ХАМАС, «Палестина ислам жихады» және «Палестинаны азат ету халық майданы» атты саяси ұйымдары Газа секторындағы болашақ әкімшіліктің құрылымына қандай да бір шетелдік қатысуға үзілді-кесілді қарсы екенін мәлімдеді.
«Газа секторын басқару жүйесін қалыптастыру мен оның жұмыс тәртібін белгілеуге қатысты қандай да бір сыртқы ықпал мен бақылауды қабылдамаймыз. Бұл – тек палестиналықтардың ішкі ісі», – деп хабарлайды ЭФЭ агенттігі.
Сонымен қатар, аталған ұйымдар Газа секторын қалпына келтіру және оның дамуына қолдау көрсету бағытында халықаралық қауымдастықтың, әсіресе араб мемлекеттерінің қатысуын құптайтындарын жеткізді.
Газа секторындағы ахуалды тұрақтандыруға арналған жоспар аясында бұл өңірде саяси бейтарап, кәсіби мамандардан тұратын уақытша үкімет құру көзделуде. Аталған үдерісті қадағалау арнайы халықаралық органға жүктелмек.
