Вашингтон. 10 қараша. ИНТЕРФАКС. АҚШ президенті Дональд Трамп 2020 жылғы президенттік сайлауға заңсыз араласқан деп айыпталған өзінің бірнеше ондаған жақтасын, оның ішінде бұрынғы кеңесшісі және адвокаты Руди Джулианиді кешірді.
«Бұл жарлық 2020 жылғы президенттік сайлаудан кейін америкалықтар тап болған қорқынышты ұлттық әділетсіздікке нүкте қойып, ұлттық татуласу процесін жалғастырады», – делінген кешіру мәселелері бойынша прокурор Эд Мартин X әлеуметтік желісінде жариялаған құжатта.
Мәтінде Трамп «дауыс беру нәтижелеріндегі алаяқтық пен әлсіздіктерді әшкерелеуге тырысқан» және 2020 жылғы сайлауға байланысты болған адамдарға «толық, абсолютті және сөзсіз» кешірім беріп отырғаны айтылған.
Тізімде 77 есім аталған, оның ішінде Джулиани және Ақ үй әкімшілігінің бұрынғы басшысы Марк Медоуз бар. Жарлықта Трамптың өзіне бұл кешірім қолданылмайтыны нақты көрсетілген.
Өз кезегінде Associated Press агенттігі президенттік кешірім тек федералдық соттарда қаралатын істерге ғана қатысты екенін атап өтеді.
Америкалық БАҚ-тардың жазуынша, Трамптың бұл шешімі едәуір дәрежеде символдық сипатқа ие, өйткені қазіргі уақытта кешірілгендердің ешқайсысы федералдық қылмыстар бойынша айыпталмаған. Олардың кейбірі жекелеген штаттардың сот органдарында қаралып жатқан істерде фигурант болып табылады.
2020 жылы президенттік сайлауда Джо Байден жеңіске жеткеннен кейін Трамп пен оның кейбір жақтастары сайлау нәтижелерін жоққа шығаруға тырысқан болатын. 2021 жылы Джорджия штатының прокуратурасы олар сайлау нәтижелерін өзгертуге әрекет жасау арқылы заң бұзды ма деген мәселе бойынша тергеу бастаған. Кейіннен оларға қылмыстық айып тағылған.
