Гонконг. 20 қараша. ИНТЕРФАКС – Солтүстік Кореяның бір топ әскери қызметкері сәрсенбі күні Оңтүстік Кореямен арадағы әскери демаркациялық шекара сызығын қысқа уақытқа кесіп өтті, деп хабарлайды бейсенбі күні “Ренхап” агенттігі.
Агенттік дереккөздерінің мәліметінше, КХДР әскери қызметкерлері шекара маңында қандай да бір жұмыстарды атқарып жатқанда шекара сызығынан өтіп кеткен. Осыдан кейін Оңтүстік Кореяның қарулы күштері ескерту ретінде оқ атқан, содан соң солтүстіккореялықтар өз аймағына қайта оралған.
Оқиғаға қатысты нақты қанша сарбаз шекараны бұзғаны немесе олардың қаруланғаны туралы мәлімет берілмеді.
Агенттіктің еске салуынша, биылдың өзінде КХДР әскерилерінің шекараны бұзуына қатысты шамамен онға жуық жағдай тіркелген.
Бұған дейін қараша айында Сеул билігі екі ел арасындағы демаркациялық сызықты нақтылау мақсатында Оңтүстік Корея мен КХДР арасындағы әскери келіссөздер жүргізудің қажеттілігі туралы мәлімдеген еді.
Әскери демаркациялық шекара сызығы – Оңтүстік және Солтүстік Корея арасындағы құрлық шекарасы. Оның екі жағында да демилитаризацияланған аймақ орналасқан. Бұл шекара сызығы мен аймақ 1953 жылғы Корей соғысын тоқтату туралы келісім негізінде белгіленген.
