АСТАНА. 20 қараша. ИНТЕРФАКС-ҚАЗАҚСТАН – Қазақстан Республикасының Мемлекеттік кеңесшісі, парламенттік реформалар жөніндегі жұмыс тобының жетекшісі Ерлан Қарин Мемлекет басшысы Қасым-Жомарт Тоқаевқа жұмыс тобының аралық нәтижелері жөнінде баяндады, деп хабарлады бейсенбі күні Президенттің баспасөз қызметі.
Мемлекеттік кеңесшінің айтуынша, «Парламенттік реформа» арнайы айдары іске қосылған сәттен бастап, e-Otinish мемлекеттік платформасы мен Egov сервисі арқылы азаматтар мен қоғам белсенділерінен бір ай ішінде шамамен 300-ге жуық ұсыныс келіп түскен.
Сонымен қатар, алты саяси партия өз тарапынан реформаларға қатысты ұсыныстарын жіберді. Олар: «Amanat», «Ауыл», «Ақ жол», «Respublica», Қазақстанның Халық партиясы және Жалпыұлттық социал-демократиялық партиясы. Ұсыныстарда бір палаталы парламенттің қызмет ету тетіктері мен парламенттік партиялардың өкілеттіктері қарастырылған.
Жұмыс тобының мүшелері де өздерінің сараптамалық ұсынымдарын енгізді.
Қазіргі уақытта барлық ұсыныстарды талдау және жүйелеу жұмыстары жүргізіліп жатыр. 2025 жылғы 2 желтоқсанда жұмыс тобының екінші отырысын өткізу жоспарлануда. Бұл жиында жекелеген бағыттар бойынша ұсыныстар жан-жақты қарастырылатын болады.
Баспасөз қызметінің хабарлауынша, Президент алдағы парламенттік реформаның маңыздылығын ерекше атап өтіп, оның елдегі саяси өзгерістердің жаңа кезеңі болатынын айтты. Мемлекет басшысы келіп түскен барлық ұсынысты жан-жақты қарап, солардың негізінде парламенттік жүйені жаңғыртуға арналған нақты ұсыныстар әзірлеуді тапсырды.
Еске салайық, Мемлекет басшысы 2025 жылғы 8 қыркүйектегі Қазақстан халқына Жолдауында қос палаталы парламенттің орнына бір палаталы құрылым енгізу мүмкіндігін зерттеуді ұсынып, бұл мәселені референдум арқылы шешуді ұсынған болатын.
«Осы реформаның маңыздылығын ескере отырып, толыққанды пікірталасқа кемінде бір жыл уақыт қажет. 2027 жылы жалпыұлттық референдум өткізіп, кейін Конституцияға тиісті өзгерістер енгізуге болады», – деген еді Президент. Сонымен қатар, ол бір палаталы парламент құрылатын болса, оны тек партиялық тізім бойынша сайлау қажет екенін атап өтті.
Қазан айының басында Президент парламенттік реформалар жөніндегі жұмыс тобын құру туралы жарлыққа қол қойды. Оның құрамына Мәжіліс пен Сенат депутаттары, Қазақстан халқы Ассамблеясының өкілдері, саяси партия фракцияларының басшылары, ғылыми-зерттеу институттарының өкілдері, құқықтанушы ғалымдар, сарапшылар мен Ұлттық құрылтай мүшелері кірді.
Айта кетейік, қазіргі Қазақстан Парламенті 1995 жылдан бері екі палатадан – Сенат пен Мәжілістен тұрады.
