ҚР Үкіметі хабарлайды: Қазақстан делегациясы Премьер-Министрдің орынбасары – Үкімет Аппаратының басшысы Ғалымжан Қойшыбаевтың жетекшілігімен Өзбекстан астанасы Ташкент қаласында өткен «Еуропалық Одақ – Орталық Азия» үшінші экономикалық форумына қатысты. Аталған форум – Еуропалық Одақ пен Орталық Азия елдері арасындағы экономикалық ынтымақтастық, сауда, инвестиция және тұрақты даму мәселелерін талқылауға арналған маңызды алаң. Іс-шара барысында экономикалық байланыстарды кеңейту, көлік және энергетикалық өзара байланыс, жеткізу тізбектерінің тұрақтылығын арттыру, сондай-ақ цифрлық трансформацияны ілгерілету жолдары қарастырылды. Форумның пленарлық отырысында сөз сөйлеген Ғалымжан Қойшыбаев Қазақстан мен Еуропалық Одақ арасындағы экономикалық байланыстардың тұрақты түрде кеңейіп келе жатқанын атап өтті. Сондай-ақ Президент Қасым-Жомарт Тоқаевтың ЕО-мен жан-жақты ынтымақтастықты тереңдетуге ерекше көңіл бөлетінін және Орталық Азия елдері мен Еуропалық Одақ арасындағы сындарлы диалогты жоғары бағалайтынын жеткізді. Форум аясында Халықаралық әріптестік жөніндегі Еурокомиссар Йозеф Сикеламен жұмыс кездесуі өтті. Келіссөз барысында тараптар Қазақстан мен Еуропалық Одақ арасындағы стратегиялық серіктестікті атап өтіп, экономиканың басым бағыттарындағы бірлескен жобаларды іске асыру мәселелерін талқылады.
Евразия24 пікірі:
Еуроодақ Орталық Азияда «Global Gateway» бастамасын белсенді түрде ілгерілетуде. Осыған байланысты форум барысында негізінен тұрақты жеткізу тізбектерін құру, стандарттарды арттыру, инвестиция тарту және бизнес жүргізу ортасын жақсарту жөніндегі бұрын қабылданған декларацияларды практикалық деңгейде жүзеге асыру мәселелері талқыланды. Әңгіме, әрине, Орталық Азия туралы болып отыр. Себебі бұл өңір Еуроодақтың артқан қызығушылығын шикізаттық тәуелділіктен арылудың және жоғары қосылған құнды өнім өндірісіне көшу мүмкіндігі ретінде қарастырады. Ал Еуроодақ үшін Орталық Азия неліктен маңызды? Өйткені бұл – стратегиялық маңызды шикізат көздеріне, ең алдымен сирек кездесетін жер металдарына қол жеткізу мүмкіндігі. Бұл металдар – заманауи технологияларды, энергетиканы, көлік пен қорғаныс салаларын дамытуда шешуші рөл атқаратын ресурстар. Айта кетсек, 2025 жылғы сәуірде Самарқандта өткен алғашқы «Орталық Азия – Еуроодақ» саммитінде стратегиялық әріптестіктің негізі қаланған болатын. Ал қараша айында тараптар нақты жобаларға қол қойып, инфрақұрылымдық, шикізаттық және «жасыл» бастамалар бойынша бірлескен жоспарларды қалыптастырды.
