ВАШИНГТОН. 5 желтоқсан. ИНТЕРФАКС – АҚШ Қарулы күштерінің Оңтүстік қолбасшылығы (SOUTHCOM) Пентагон басшысы Пит Хегсеттің бұйрығымен Тынық мұхитының шығыс бөлігінде есірткі тасымалдады деген күдікке ілінген катерге соққы берілгенін хабарлады.
«Southern Spear («Оңтүстік найза») операциясы аясында халықаралық суларда орналасқан және террористік ұйым ретінде танылған құрылымға тиесілі кемеге әуеден соққы жасалды. Барлау мәліметтері бұл кеменің есірткі контрабандасын тасымалдап, Тынық мұхитының шығыс бөлігіндегі белгілі наркожолмен жүргенін растады. Кеме бортында болған төрт ер адам – есірткімен айналысушы содырлар – жойылды», – делінген SOUTHCOM таратқан ресми хабарламада.
Қолбасшылық шабуылдың нақты сәтін бейнелейтін 21 секундтық бейнежазбаны әлеуметтік желілерде жариялады.
Қыркүйек айынан бері АҚШ әскери күші Кариб теңізі мен Тынық мұхитында есірткі тасымалдайды деген 23 кемеге соққы берген. Барлау қызметінің мәліметінше, бұл кемелер заңсыз есірткі тасымалымен айналысқан. Аталған шабуылдар нәтижесінде 87 адам көз жұмған.
Соңғы соққы бейсенбі күні жасалды. Бұл – Пентагонның қыркүйекте бір кемеге екі мәрте соққы бергені үшін АҚШ Конгресіндегі қос партия тарапынан сынға ұшырап жатқан сәтпен тұспа-тұс келді. Ол кезде шабуылдан аман қалған экипаж мүшелерін жою үшін әдейі қайталама соққы жасалғаны айтылған.
Бұған дейін америкалық БАҚ президент Дональд Трамптың әскерді Латын Америкасындағы наркокартельдерге қарсы соққы жасауға жасырын түрде жұмылдыруға бұйрық бергенін жазған болатын. Кейінірек, дереккөздерге сілтеме жасаған басылымдар Вашингтон Венесуэла президенті Николас Мадуроны биліктен кетіру мақсатында қысым жасау науқанын жүргізіп жатқанын бірнеше рет хабарлаған.
