Вашингтон. 12 желтоқсан. ИНТЕРФАКС – АҚШ билігі елдің қарсыластарына қарсы кибершабуылдар жүргізу үшін жеке компанияларды тартуды жоспарлап отыр. Бұл ретте бұған дейін тек арнайы қызметтердің құзыретіне кірген өкілеттіктерді компанияларға беру көзделуде. Бұл туралы дереккөздерге сілтеме жасаған Bloomberg агенттігі жұма күні хабарлады.
Агенттік мәліметінше, мәселенің мән-жайынан хабардар тұлғалардың айтуынша, АҚШ президенті Дональд Трамптың әкімшілігі шетелдік қарсыластарға қарсы киберкеңістікте шабуылдық операцияларды жүзеге асыруға жеке бизнесті тартуға дайындалып жатыр.
Bloomberg деректеріне сәйкес, АҚШ бұл жоспарлар туралы алдағы апталарда таныстырылуы тиіс киберқауіпсіздікті қамтамасыз ету жөніндегі жаңа стратегияда жарияламақ. Құжаттың жобасымен таныс дереккөздер онда Ақ үйдің кибероперациялар кезінде компаниялармен нақты қалай жұмыс істейтіні жөнінде егжей-тегжейлі мәліметтер көрсетілмегенін атап өткен.
АҚШ әкімшілігі стратегия жарияланғаннан кейін қосымша түсіндірмелер беруді жоспарлап отыр. Сонымен қатар Bloomberg атап өткендей, қазіргі уақытта жеке компанияларға хакерлік шабуылдар жүргізуге құқық беретін нақты заңнамалық негіз жоқ.
Бұдан бөлек, жаңа стратегияда деректерді қорғау мен киберкеңістікті реттеу шараларын оңтайландыру, ақпараттық жүйелерді жаңғырту, аса маңызды инфрақұрылымды қорғау, шифрлау тетіктерін күшейту және кванттық есептеу технологияларын дамыту қажеттігі жөніндегі ұсынымдар қамтылады.
Дереккөздердің айтуынша, жеке компанияларды кибероперацияларға тарту мәселесі бұрынғы президент Джо Байден әкімшілігі тұсында да талқыланған, алайда сол кезде бірыңғай саясат қалыптастыру мүмкін болмаған.
