Ташкентте өткен Dostlik Cup 2026 халықаралық футбол фестиваліне қатысқан қазақстандық балалар, жаттықтырушы және бір топ ата-ана қонақүйде таңғы ас ішкеннен кейін жаппай уланып қалды.
«Ташкентте өтіп жатқан Dostlik Cup 2026 халықаралық футбол фестиваліне қатысушылардың бірнешеуі өзін жайсыз сезініп, ауруханаға жеткізілді. Ата-аналар балалардың жаппай сырқаттануына қонақүйдегі тағам сапасы себеп болуы мүмкін деп күдіктенеді. Жарысқа ұлымен бірге барған аналардың бірінің айтуынша, алғашқы балалар 30 қазанда таңғы астан кейін ауыра бастаған», – деп Kazinform агенттігі хабарлады.
Қазақстанның Сыртқы істер министрлігі жағдайды бақылауда ұстап отыр.
Ақпарат агенттігі Қарағанды облысының дене шынықтыру және спорт басқармасына сілтеме жасап хабарлағандай, Ташкентке 60 бала, 32 ата-ана және төрт жаттықтырушы барған.
«Қазір Ташкенттегі жұқпалы аурулар ауруханасында 28 адам ем қабылдап жатыр. Олардың 16-сы – бала, біреуі – жаттықтырушы, қалған 11-і – ата-ана. Барлығы бір қонақүйде тұрып, сол жерде тамақтанған», – делінген хабарламада.
«Қазір Ташкенттегі жұқпалы аурулар ауруханасында 28 адам жатыр. Олардың 16-сы – бала, біреуі – жаттықтырушы, 11-і – ата-ана. Барлығы бір қонақүйде тұрып, сол жерде тамақтанған», – делінген жарияланымда.
Жағдайы жақсарған жас футболшылар мен олардың ата-аналары Қазақстанға оралып жатыр. 2 қарашадағы мәлімет бойынша, Ташкент ауруханаларында 11 бала мен үш ата-ана дәрігерлердің бақылауында қалған.
Материал әзірленген кезде ашық дереккөздерде Өзбекстанның мемлекеттік органдары жаппай улану оқиғасына қатысты тергеу жүргізіп жатқаны жөнінде ешқандай ақпарат болған жоқ. Әлеуметтік желілерде зертханалық тексерулер жүргізіліп жатқаны ғана талқыланғанымен, олардың нәтижелері әлі жарияланбаған.
Jas Batir, Nomad Akademiya және Skaut футбол мектептерінің Ташкентке сапары жеке адамдардың бастамасымен ұйымдастырылып, барлық шығын жеке қаражат есебінен өтелген. Демек, сәтсіз аяқталған бұл сапарға бюджет қаржысының жұмсалуына қатысты мәселе жоқ. Алайда жас спортшылардың қонақүйге орналасуы мен тамақтануын ұйымдастыруға байланысты сұрақтар туындайды. Қазақстандықтар тоқтаған қонақүйде мұндай жағдай алғаш рет тіркелсе, мәселе бір басқа. Ал бұған дейін де осындай оқиғалар болған болса ше?
Біздіңше, мұндай жағдай Қазақстанның кез келген қаласында, әсіресе елордада болғанда, қонақүйдің жұмысы әлдеқашан уақытша тоқтатылып, тиісті тексеру басталып, алғашқы нәтижелері де белгілі болар еді. Өйткені мұндай мәселелерде Қазақстанның санитариялық-эпидемиологиялық қызметі қашанда қырағылық танытады.
