«Венесуэла президентінің ұрлануы мен тұтқындалуы — кезекті геосаяси дауыл ма, әлде әлемдік тәртіптегі жаңа шындық па?» — «Айран» арнасындағы сұхбат.
Евразия24 пікірі:
АҚШ-тың «арнайы венесуэлалық операциясын» — Венесуэла президентінің ұсталуын біздің, шартты түрде айтқанда, батысшыл бағыттағы ақпараттық жобалар қалай түсіндіретіні қызық болды. Олар қаншалықты жедел үн қатады, Мадуроның тұтқындалуын Ресей президенті Владимир Путиннің кезекті әрі түпкілікті жеңілісімен, сондай-ақ Ресей саясатының толық күйреуімен қаншалықты шебер байланыстырады деген сауал да туындады. Қытайды да қосуы әбден мүмкін еді.
Қазір «Ордадан» мұндай белсенділік күту қиын. Ал басқа, қаржыландырылуы аз емес ресурстар соңғы уақытта Ресейге «агрессор» деген айыпты ашық тағуда біршама сақтық танытып жүр. Және бұл — орынды. Дәлірек айтқанда, жағдайдың қай бағытқа бет алып бара жатқанын дұрыс бағамдап отыр.
Міне, осы тұрғыда «Айран» сайты да назар аудартты. Басты бетінде Kaspi.kz компаниясының корпоративтік коммуникациялар жөніндегі басшысы Маржан Елшібаева бастаған команда Венесуэлаға қатысты барынша бейтарап, кәсіби деңгейде дайындалған материал ұсынған. Материал — эмоциясыз, асыра сілтеусіз, салмақты түрде берілген.
Алайда бейнероликтің тақырыбының өзі-ақ көп нәрсені аңғартады — «АҚШ не үшін Венесуэлаға шабуыл жасады? Путин тағы бір диктатор-досынан айырылды ма?»
«Айран» алаңында жиі пікір білдіретін сарапшы Досым Сәтбаев та бұл жолы өзіне тән ұстанымынан айныған жоқ. Ол Венесуэла төңірегіндегі жағдайды жүйелі түрде тарқатып, назарды тағы да кездейсоқ емес тұстарға аударды. Оның айтуынша, әлемдік тәртіптің іргесі Мадуроның ұсталуымен де, АҚШ-тың кезінде Гренадада немесе Панамада жасаған әрекеттерімен де шайқалмаған. Бұл үдеріс НАТО-ның біржақты кеңеюінен де, майдан арқылы жүзеге асқан билік ауысуынан да басталмаған. Сәтбаевтың пайымдауынша, халықаралық тәртіптің бұзылуы нақты бір сәтпен байланысты — ол Ресейдің Украинаға қарсы соғыс бастаған кезеңі.
Бұл енді кездейсоқ айтылған сөз де, аңдаусызда кеткен тіркес те емес. Бұл — кәсіби саясаттанушының саналы түрде құрған тұжырымы.
