ZTB News хабарлайды: «Ақорда 2024 жылға арналған қазақстандық шенеуніктердің табыстары туралы мәліметтерді жариялады. Шынын айтқанда, нақты деректер мен шынайы көрініс бір-біріне кереғар. Мемлекеттік қызметшілердің өз табысы салыстырмалы түрде төмен, ал олардың жұбайларының кірісі бірнеше есе, кей жағдайда тіпті жүздеген есе жоғары. Мәселен, Алматының бұрынғы әкімі, қазіргі уақытта Президент Әкімшілігі басшысының орынбасары қызметін атқаратын Ерболат Досаевтың жылдық табысы 14 млн теңгеден сәл асқан. Ал оның жұбайы Гүлнар Досаева сол кезеңде 2,3 млрд теңге табыс көрсеткен. Құжатта сондай-ақ Қауіпсіздік кеңесінің хатшысы, Президенттің көмекшілері мен кеңесшілері де көрсетілген. Олардың жеке табыстары көрсетілмегенімен, жұбайларының кірістері берілген. Көп жағдайда бұл сомалар жылына 48 млн теңгеден аспайды, ал ең төмен көрсеткіш — 1 млн теңге. Бұл табыс Президент кеңесшісі Алексей Цойдың жұбайына тиесілі. Министрлер арасынан табысы туралы мәліметті Премьер-министрдің орынбасары – ұлттық экономика министрі Серік Жұманғарин жариялаған. Оның жұбайы 2024 жылы негізінен бағалы қағаздар нарығындағы инвестициялар есебінен шамамен 89 млн теңге тапқан. Ал министрдің өзінде жалақыдан басқа қосымша табыс көрсетілмеген. Ұқсас жағдай басқа да шенеуніктердің отбасыларында байқалады. Ұлттық экономика вице-министрі Асан Дарбаевтың жұбайы 69 млн теңгеден астам табыс тапқан, ал Қорғаныс министрінің орынбасары Қаныш Әбубәкіровтың жұбайы — 34 млн теңге. Астананың бұрынғы әкімі, қазіргі Қазақстанның Эстониядағы елшісі Алтай Көлгінов 0 теңге табыс көрсеткен, ал оның жұбайының жылдық кірісі шамамен 17 млн теңгені құраған».
Eurasia24 түсіндіреді:
Ашық деректерге сүйенсек, Қазақстандағы жоғары лауазымды ер азамат шенеуніктердің отбасылық табыс құрылымында негізгі үлес көбіне жұбайларының кірісіне тиесілідей көрінеді. Негізі, мұнда тұрған ештеңе жоқ — Қазақстанда гендерлік теңдік бар, әйелдер кәсіпкерлігі қарқынды дамып келеді. Тек 2015 жылы Табиғи монополияларды реттеу агенттігінің бұрынғы басшысы Мұрат Оспановпен болған жағдай қайталанбаса болғаны. Ол мемлекеттік қызметте жүрген кезінде тек жалақысын ғана көрсетіп, кейін ірі көлемде пара алғаны үшін сотта түрме жазасының орнына 1,1 млрд теңге көлемінде «мардымсыз» айыппұлмен құтылған еді. 2018 жылы «Қазақстан инжиниринг» квазимемлекеттік компаниясы төрағасының бұрынғы орынбасары Қанат Сұлтанбеков те сот үкімімен 10 жылға бас бостандығынан айырылудың орнына мемлекетке 2,1 млрд теңге төледі. Айта кетерлігі, ол Астанадағы LRT құрылысына байланысты ұрлық ісі бойынша бес жылдан бері іздеуде жүр. Бұған дейін Алматы мен Астана әкімдіктерінде жоғары лауазымда қызмет атқарған. Бұрынғы жемқор шенеуніктерді қазіргі мемлекеттік аппаратпен салыстыруға болмайды. Қазіргі биліктің ашықтығын, адал жұмысын және елге шынайы пайда әкелуге деген ұмтылысын біз көріп отырмыз.
