«Қазақстан мен Ресей достасуға міндетті емес, олар достасуға мәжбүр», – деді Қазақстанның Ресей Федерациясындағы елшісі Дәурен Абаев 26 қазанда Республика күніне орай Қазақстан елшілігі ұйымдастырған салтанатты қабылдауда сөйлеген сөзінде. Осылайша елші бұған дейін айтылған пікірдің негізгі мазмұнын сақтай отырып, оны басқаша тұжырымдады.
Еуразия24 пікірі:
Парафраз – белгілі бір мәтіннің немесе өзге адамның айтқан сөзінің негізгі мағынасын сақтай отырып, оны басқаша тұжырымдап жеткізу тәсілі.
Бұл жолы еліміздің ресми өкілі Қазақстан президенті Қасым-Жомарт Тоқаевтың бір жыл бұрын, дәл осы қазан айында Ресей Федерациясының президенті Владимир Путинмен кездесуінде айтқан сөзін өзінше тұжырымдаған.
«Қазақстан мен Ресейдің одақтастығы кездейсоқ емес екенін орынды атап өттіңіз. Біздің елдерімізді әлемдегі ең ұзын, 7591 шақырымға созылған мемлекеттік шекара байланыстырады.Екі ел арасындағы тығыз қарым-қатынас Қазақстан мен Ресейдің одақтастығы мен стратегиялық серіктестігі ұзақ жылдарға жалғасып, достық байланыстарының да сақталуы заңды екенін көрсетеді».
Мұның бәрі орынды әрі айтылған жағдайға сай келеді. Қазақстан елшісі мемлекет басшысының сөзін сол күйінде келтіріп немесе жай ғана қайталап отырған жоқ. Ол негізгі мағынаны сақтай отырып, сол ойды өзінше тұжырымдаған.
Бұл ретте Қазақстан елшісі өзін қызметке тағайындаған мемлекет басшысының сөзіне сілтеме жасамайды. Мұны да орынды деуге болады. Өйткені екі елдің достық қарым-қатынас орнатуға «мәжбүр» екені туралы алғаш кім айтқанын халық жақсы біледі. Оның үстіне, жоғары лауазымды тұлғалардың ресми сөздерінде президентке үнемі сілтеме жасай беруі көпшілікті біршама жалықтырғаны да рас.
Жалпы, ресми жиынға тән қалып сақталғанымен, елшінің сөзі көркем тіркестерге бай әрі тартымды шыққан. Оны оқу да, тыңдау да қызықты. Мәселен, екі елдің достық қарым-қатынас орнатуға «мәжбүр» екені туралы тұжырымға ұласатын мына үзіндіге назар салайық:
«Белгілі саясаткерлердің бірі: «Ресей – өзін мемлекет ретінде көрсететін құрлық. Ресей – өзін ұлт ретінде көрсететін өркениет», – деген екен. Бұл сөздер Калининградтағы Курш шығанағы маңындағы Курш құмқайырынан Камчаткадағы Гейзерлер аңғарына дейін созылып жатқан алып елдің ауқымын айқын сипаттайды. Ал Қазақстан үшін Ресей жай ғана көрші емес, одақтас әрі стратегиялық серіктес. Біз екі ел арасындағы құрлық шекарасының әлемдегі ең ұзын шекара екенін жиі айтамыз. Алайда оның ұзындығынан да маңыздысы – осы шекара арқылы қазақстандықтар мен ресейліктердің күнделікті сан алуан байланысын қамтамасыз ететін көзге көрінбес сансыз тамырлардың болуы. Бұл жерде мемлекет басшыларының өзара сенімге негізделген қарым-қатынасы мен тұрақты кездесулері, тауар айналымы немесе туризм туралы ғана сөз болып отырған жоқ. Әрине, бұлардың бәрі маңызды. Қуаныштысы, екі елдегі туыстардың бір-біріне барып тұруы, достар мен бұрынғы сыныптас, курстастардың бас қосуы да осы байланыстың ажырамас бөлігі».
Қорыта айтқанда, елшінің сөзін толық оқып, өздеріңіз де баға бере аласыздар.
