Zakon.kz хабарлайды: «Депутат Асхат Аймағамбетов 2026 жылғы 28 қазанда Құрылтай отырысының үзілісінде журналистерге Қазақстанда ең төменгі жалақыны арттыруға қажетті қаражаттың қайдан бөлінетінін айтты. Асхат Аймағамбетов ең төменгі жалақы мөлшерінің өсуі ең алдымен еңбек ақысына әсер ететінін атап өтті. «Президент бұл өзгерістің шамамен қанша адамға қатысты болатынын айтып өтті. Мемлекеттік секторда жұмыс істейтіндерге келсек, бүгінде бюджеттен жалақы алатын 300 мыңнан астам адам бар. Сондықтан олардың жалақысын көтеру үшін бюджет жобасына өзгерістер енгізіліп, қосымша қаражат бөлінеді. Сондай-ақ белгілі бір еңбек өтілі мен біліктілігі бар 77 мыңға жуық дәрігердің де жалақысы өсетіні қуантады. Бүгін айтылғандай, олардың жалақысы шамамен 40 пайызға артады. Бұл да айтарлықтай өсім», – деді депутат. Оның айтуынша, қазіргі уақытта бюджет жобасы Парламенттің қарауында. Депутаттар 2027 жылғы 1 қаңтардан бастап жалақыны көтерілген мөлшерде төлеу үшін бюджет жобасына қажетті түзетулерді жедел енгізуге мүмкіндік бар екенін атап өтті».
Еуразия24 пікірі:
Ең төменгі жалақы мөлшеріне қатысты жағымды жаңалық жарияланды. Президент Қасым-Жомарт Тоқаев 28 қазанда Қазақстан халқына арнаған Жолдауында 2027 жылы 1 қаңтардан бастап ең төменгі жалақыны 85 мың теңгеден 110 мың теңгеге дейін көтеруді тапсырды. Осылайша, ең төменгі жалақы мөлшері бірден 29,4 пайызға артады. Мемлекет басшысы бұл шешім 1,8 миллионға жуық қазақстандықтың, оның ішінде бюджеттен жалақы алатын 370 мыңнан астам қызметкердің табысын арттыруға мүмкіндік беретінін атап өтті.
Президенттің бұл шешімі әсіресе жеке секторда жұмыс істейтін азаматтар үшін маңызды болмақ. Өйткені көптеген жұмыс беруші жалақысы төмен қызметкерлердің еңбекақысын белгілеу кезінде мемлекет бекіткен 85 мың теңгелік ең төменгі мөлшерді негізге алады. Мұны enbek.kz электрондық еңбек биржасында жарияланған бос жұмыс орындары мен ұсынылатын жалақы мөлшерінен де байқауға болады.
Жеке сектордағы кейбір жұмыс берушілердің ең төменгі жалақы мөлшерін басшылыққа алып, еңбекақы шығындарын шектеуі қаржы тапшылығынан емес, қолданыстағы заңнамада көзделген мүмкіндіктерге байланысты болуы ықтимал. Заңнамаға сәйкес, жұмыс берушілер ең төменгі жалақы мөлшерінен кем төлемеуге міндетті, алайда одан жоғары еңбекақы белгілеу міндеттелмеген. Осыған байланысты кейбір жұмыс берушілер қызметкерлердің жалақысын 85 мың теңге деңгейінде сақтап келеді. Енді ең төменгі жалақы мөлшері бірден 25 мың теңгеге көтеріледі. Бұл кәсіпорындардың еңбекақы төлеу қорын қалыптастыру кезінде жаңа талаптарды ескеруін қажет етеді.
Сонымен қатар 110 мың теңге бір адамның, әсіресе отбасының бір айлық тұрмыс шығындарын толық өтеуге әлі де жеткіліксіз. Дегенмен бұл бұрынғы 85 мың теңгемен салыстырғанда елеулі өсім. Ең төменгі жалақыны арттыру туралы шешім мемлекеттің еңбекке ақы төлеу деңгейін көтеруге бағытталған саясатын көрсетеді. Сондай-ақ бұл қадам жұмыс берушілерге еңбекақы мөлшерін ұлғайту қажеттігін білдіретін маңызды белгі болмақ.
