Ресей Сыртқы істер министрлігі хабарлайды: ЕАЭО мен Үндістан еркін сауда аймағы туралы келісім бойынша ресми келіссөздерді бастады 2024 жылғы 26–28 қараша аралығында Нью-Делиде Еуразиялық экономикалық одақ (ЕАЭО), оған мүше мемлекеттер мен Үндістан Республикасы арасында еркін сауда аймағын құру туралы келісім бойынша алғашқы келіссөз өтті. Келіссөздер барысында тараптар келісімнің реттеушілік бөлімін талқылауда елеулі ілгерілеуге қол жеткізіп, болашақ тарифтік келісімнің негізгі параметрлерін белгіледі, сондай-ақ алдағы іс-қимыл жоспарын келісіп алды. «ЕАЭО мен Үндістанның келіссөз жүргізушілері сындарлы көзқарас танытып, нақты нәтижеге ұмтылысын көрсетті. Өз тарапымыздан “жеделдетілген тәртіп” режимінде жұмыс істеуге дайын екенімізді растаймыз. 2026 жылғы ақпан айына жоспарланған келесі келіссөз аясында импорттық тарифтер төмендетілетін немесе жойылатын негізгі тауарлар тізімі бойынша мазмұнды диалог болады деп үміттенеміз», – деді Еуразиялық экономикалық комиссияның Сауда жөніндегі министрі Андрей Слепнёв.
Евразия24 пікірі:
Еуразиялық интеграция құрлықтағы сауда-экономикалық ынтымақтастықты кеңейтіп келеді. Үндістанмен өзара байланыстарды тереңдету ЕАЭО үшін интеграциялық тартымдылықты арттырумен қатар, бірқатар экономикалық артықшылықтар әкелуі мүмкін. 2024 жылы ЕАЭО мен Үндістан арасындағы тауар айналымы шамамен 69 млрд АҚШ долларын құрап, 2023 жылмен салыстырғанда 7%-ға өсті. Болашақта еркін сауда аймағы туралы келісімге қол қойылған жағдайда, ЕАЭО экономикасы қосымша 1,5%-ға дейін өсім көрсетуі мүмкін деген болжам бар. Кедендік алымдарды төмендету немесе мүлде алып тастау арқылы Үндістан нарығы қазақстандық және одаққа мүше елдердің ауыл шаруашылығы өнімдері, шикізат пен өнеркәсіптік тауарларына ашылады. Бұл – ЕАЭО-дағы экспорттаушылар үшін сөзсіз артықшылық. Ал Қазақстан үшін, Үндістанмен екіжақты байланыс әрекет етіп тұрғанына қарамастан, сауда географиясы кеңейе түседі. Импорт жағынан алғанда, Үндістаннан келетін бәсекеге қабілетті тұтыну тауарлары, тоқыма өнімдері және әсіресе фармацевтикалық өнімдер төмендетілген немесе нөлдік тарифтік мөлшерлемелермен ішкі нарықта қолжетімді бола түседі. Бұл – тұтынушылар үшін жағымды фактор. Алайда Үндістаннан келетін арзан импорт көлемінің артуы ЕАЭО аумағындағы отандық өндірушілерге бәсекелестік қысым тудырып, кейбір салаларды қиын жағдайға қалдыруы ықтимал. Сондықтан келіссөздер барысында артықшылықтармен қатар, ықтимал тәуекелдер де мұқият сарапталуы қажет.
