Еуразиялық экономикалық комиссия хабарлайды: «Еуразиялық экономикалық комиссия Коллегиясының жанындағы Қаржы нарықтары жөніндегі консультативтік комитеттің отырысы экономика және қаржы саясаты жөніндегі министр Бахыт Сұлтановтың төрағалығымен өтті (…). Күн тәртібіндегі басты мәселе – Одақтың ортақ қаржы нарығын іс жүзінде қалыптастыру тетіктері болды. Атап айтқанда, Комиссия мен мүше мемлекеттер бірлесіп әзірлеген қаржы секторының заңнамасын үйлестірудің көпдеңгейлі (дифференциалды) тәсілін қолдану мәселесі қаралды. Аталған тәсілді және оны іске асыру кезеңдерін 2025 жылғы желтоқсанда өтетін Жоғары Еуразиялық экономикалық кеңес отырысында мемлекет басшыларының қарауына ұсыну жоспарланып отыр (…). «Біз ЕАЭО аясында ортақ қаржы нарығын төрт негізгі қағидат негізінде қалыптастырып жатырмыз: реттеудің бірыңғай стандарттары, лицензияларды өзара тану, Одаққа мүше барлық елдерде жеке заңды тұлға ашпай-ақ қызмет жүргізу мүмкіндігі және ең бастысы – ведомстволарымыз арасындағы тығыз әкімшілік ынтымақтастық», – деп қорытындылады Бахыт Сұлтанов.
Евразия24 пікірі:
ЕАЭО аясындағы ортақ қаржы нарығы — бұл сөзсіз ілгерілеу, себебі ол әр елдің бизнесіне жаңа бәсекелік мүмкіндік береді. Алайда кез келген интеграцияның артықшылықтарымен қатар белгілі бір тәуекелдері де болады. Қаржы секторы тұрғысынан алғанда, ЕАЭО аумағында лицензияларды өзара тану тетігі қазақстандық компаниялардың Одақ елдеріне шығуын жеңілдетеді. Сонымен қатар, тек Қазақстан аумағында жұмыс істейтін субъектілер үшін отандық заңнаманың қолданылуы сақталады. Бұған қоса, қазақстандық финтех саласы жоғары әлеуетке ие болып, өз шешімдерін сыртқы нарықтарға экспорттауға, клиенттік базасын ұлғайтып, операциялық көлемін арттыруға мүмкіндік алады. Алайда тәуекелдер де бар және оларды ескермей болмайды. ЕАЭО-дағы ең ірі қаржы нарығы саналатын Ресей нарығы капиталдандыру деңгейінің жоғарылығы, ауқымды клиенттік базасы мен дамыған төлем инфрақұрылымы арқылы айтарлықтай артықшылықтарға ие. Бұл жағдай қазақстандық қаржы ұйымдарының табыстылық маржасына қысым түсіруі ықтимал. Сондай-ақ бірыңғай қаржы нарығы бойынша келіссөздер процесінің Ресей аумағында жүріп жатқанын, әрі ЕАЭО аясында қабылданған бірқатар шешімдердің ресейлік заңнама нормаларын негізге алатынын да ескерген жөн. Осы жағдайдың аясында Одақтың кейбір елдерінде (Қазақстан бұл санатқа жатпайды) реттеушілік талаптары жеңіл қаржы ұйымдарының құрылу тәуекелі туындайды. Ал мұндай ұйымдар ортақ нарыққа шыққаннан кейін, тіпті олар тәуекелі жоғары өнімдер ұсынған немесе банкротқа ұшыраған жағдайда да, оларға қатаң ұлттық талаптарды қолдану мүмкін болмай қалуы ықтимал.
