Қазақстан Үкіметі хабарлайды: “Олжас Бектенов Ресей Федерациясы Үкіметі Төрағасының орынбасары Дмитрий Чернышенкомен кездесу өткізді.
Кездесу барысында цифрландыру мен инновациялар, спорт, туризм және білім беру салаларындағы екіжақты ынтымақтастық мәселелері талқыланды.
Тараптар Қазақстан Президенті Қасым-Жомарт Тоқаев пен Ресей Президенті Владимир Путин арасындағы сенімді диалог пен тұрақты байланыс арқасында елдер арасында берік экономикалық, мәдени және гуманитарлық қатынастар қалыптасқанын атап өтті. Қос тарап арасындағы байланыс ұзақ мерзімді стратегиялық әріптестік пен одақтастық аясында тұрақты түрде кеңейіп жатыр. 2025 жылдың қаңтар-маусым айлары аралығында өзара тауар айналымы 12 миллиард АҚШ долларын құрады.
Мемлекет басшыларының тапсырмасына сәйкес, екіжақты сауда көлемін 30 миллиард долларға дейін ұлғайту бойынша жүйелі жұмыс жүргізілуде.
Сапар аясында Дмитрий Чернышенко бірқатар нысандарды аралайды. Ресей Федерациясы Үкіметі Төрағасының орынбасары Л.Н. Гумилев атындағы Еуразия ұлттық университетінің, сондай-ақ ММУ мен МГИМО-ның Қазақстандағы филиалдарының қызметімен танысады.
Евразия24 пікірі:
2025 жылдың күзіне қарай Астанадағы EXPO аумағында Alem.ai жасанды интеллекттің халықаралық орталығының ашылуы жоспарланып отыр. Бұл орталық өңірдегі жасанды интеллектті дамытуға арналған алғашқы хаб болмақ. «Біз Кремний алқабында, Сауд Арабиясында, Ұлыбританияда және Сингапурда ІТ-хабтар аштық. Бір ай бұрын Дубайда осындай кеңістік құру жөніндегі келісімге қол қойдық. Астанада жүзеге асырылатын Alem.ai — осы бағыттағы бірегей жоба», – делінген мәлімдемеде. 2025 жылдың шілде айында Цифрлық даму министрі Жаслан Мәдиев журналистерге берген сұхбатында:
«Шет мемлекеттердің делегациялары, басқа елдердің басшылары мен халықаралық компаниялар Қазақстанға келіп, дәл осындай жоба ең алғаш рет біздің елімізде іске қосылғанына куә болады. Меніңше, бұл экожүйе өзге мемлекеттер тарапынан да үлгі ретінде қабылданып, көшірілуі мүмкін. Сонымен қатар, жобаның кеңею ықтималдығы да жоғары — алдағы уақытта Alem.ai орталығының шетелдегі филиалдары ашылуы әбден мүмкін», – деп мәлімдеді (https://digitalbusiness.kz/2025-07-01/glava-mtsriap-rasskazal-chto-budet-vnutri-tsentra-alem-ai/ ). Қазақстан мен Ресей арасындағы жасанды интеллект пен цифрландыруды дамытуға бағытталған ортақ жоспарлар бұрыннан айқындалған.
Көктем айында Қазақстанға жасаған сапары барысында Ресей Үкіметі Төрағасының орынбасары Дмитрий Григоренко Alem.ai орталығы — заманауи әзірлемелерді тәжірибеге енгізу үшін екі ел арасында технологиялар алмасуына жол ашатын құрал болады деп атап өткен еді. Ал бүгінде Астанаға Ресей тарапынан тағы бір жоғары деңгейлі маман келіп отыр.
