Қазақстанда ақылға қонымды шешімдердің бірі қабылданды деуге болады. Бұған дейін азаматтар өз балконына Мемлекеттік туды ілгені үшін ескерту алып, тіпті кей жағдайда айыппұл төлеу қаупіне тап болса, енді мемлекет мұндай бастамаға ресми түрде рұқсат берді.
«Енді патриот азаматтар Қазақстанның Мемлекеттік туын ғимараттарға және балкондарға іле алады. Мемлекеттік Ту мен Елтаңбаны, олардың бейнелерін, сондай-ақ Мемлекеттік Әнұран мәтінін орналастыру қағидаларына енгізілген өзгерістерге Премьер-Министр Олжас Бектенов қол қойды. Құжатқа сәйкес, патриоттық сезімді, қазақстандық бірегейлікті білдіру, ел мен оның азаматтарының жетістіктерін қолдау мақсатында Мемлекеттік туды ғимараттарға, балкондарға (45 градус бұрышпен), сондай-ақ салтанатты іс-шаралар өтетін орындарға орналастыруға болады. Алайда ту жерге тимеуі, кемінде үш метр биіктікте орналасуы тиіс. Егер ту тік күйде ілінсе, ұлттық өрнек жоғарғы жағында болуы қажет. Сонымен қатар Мемлекеттік ту жаңа әрі бүлінбеген күйде болуы міндетті», – деп хабарлайды Kursiv.
Әрине, еркіндікпен бірге мемлекеттің туды қалай және қандай талаптарға сай ілу керектігін егжей-тегжейлі регламенттегені назар аудартпай қоймайды.
Дегенмен мұндай талаптардың енгізілуі мемлекеттік рәміздерді дұрыс пайдалану мәдениетін қалыптастыруға бағытталған деп бағалауға болады. Ең бастысы, бұл нормалар азаматтардың патриоттық сезімін білдіруге кедергі келтірмей, керісінше оған мүмкіндік беруі тиіс.
Қалжыңды шетке ысырып қойсақ, бұл өзгеріс оң бағыттағы маңызды қадам болды. Мемлекеттік Ту азаматтарды біріктіретін ортақ құндылықтың символы болуы керек, ал оны орналастыру әкімшілік жауапкершіліктен қауіптенуге себеп болмауы тиіс.
Азаматтар мереке күндері, спортшылардың жеңістерін атап өткенде немесе өз еліне деген құрметін білдіру мақсатында Мемлекеттік туды ерікті түрде жиі ілген сайын, патриотизм де табиғи әрі шынайы сипатқа ие болары анық.
