Inbusiness.kz хабарлауынша, Алматыда ескі автокөліктердің қаладағы жекелеген аумақтарға кіруіне шектеу енгізу жоспарланып отыр. Бұл шараны қалалық мәслихат бекіткен құны 28,6 млрд теңгеден асатын үш жылдық экологиялық жоспар көздейді. Бағдарламаның негізгі бағыттарының бірі – ауаның ластануын азайту. Құжатқа сәйкес, 2027 жылы «Алматы паркингпен» бірлесіп төмен шығарынды аймақтары (Low Emission Zones) құрылады. Заманауи экологиялық талаптарға сай келмейтін ескі көліктердің бұл аймақтарға кіруіне шектеу қойылады. Сонымен қатар, қала билігі көліктердің техникалық жай-күйіне бақылауды күшейтпек. EcoAlmaty ЖШС-нің бекеттері полиция қызметкерлерімен бірлесіп, күн сайын жол үстінде автокөліктердің улы шығарындыларына кемінде 550 өлшеу жүргізеді. Бұдан бөлек, Алматыда экологиялық санаты төмен ескі автокөліктерді тұрғындардан сатып алу бағдарламасын іске қосу жоспарланып отыр.
Еуразия24 пікірі:
Алматыға ескі автокөліктердің кіруін шектеу туралы бастама жаңалық емес. Бұл мәселе кемінде соңғы он бес жыл бойы арагідік көтеріліп келеді. Алайда әр жолы азаматтардың еркін жүріп-тұру құқығы мен кемсітуге жол бермеу қағидаттарына байланысты құқықтық мәселелер алдан шығып отыр. Әрине, автокөліктің экологиялық санаты Конституциямен қорғалатын белгілердің қатарына жатпайды. Сондықтан мұндай шектеулер заңмен бекітіліп, қоғамдық маңызы бар мақсатқа бағытталса, оларды енгізуге құқықтық негіз болуы мүмкін. Бұл жағдайда сөз қоршаған ортаны қорғау мен халық денсаулығын сақтауға қатысты. Дегенмен қала билігінің мұндай шешімді қандай уәжбен негіздейтіні және шектеуге ұшырайтын азаматтарға қандай балама ұсынатыны маңызды. Тағы бір өзекті мәселе – шектеу енгізілетін аймақтардың қалай жұмыс істейтіні. Егер мұндай тәртіп қаланың белгілі бір бөлігінде ғана қолданылса, оның орындалуын қалай бақылайды? Еуропаның бірқатар қалаларындағыдай автоматты камералар пайдаланыла ма, әлде бақылау бекеттері қойыла ма? Соңғы нұсқа Алматыдағы көлік қозғалысының тығыздығын ескерсек, іс жүзінде тиімсіз болуы мүмкін. Оның үстіне, қосымша кептеліс туғызып, ауа сапасына кері әсер ету қаупі де жоқ емес. Сондай-ақ автокөліктің жасы әрдайым оның атмосфераға көп мөлшерде зиянды зат шығаратынын білдірмейді. Уақтылы техникалық қызмет көрсетілген жиырма жылдық көлік кейде қозғалтқышы ақаулы, бірақ салыстырмалы түрде жаңа автокөлікке қарағанда экологиялық талаптарға жақсырақ сай келуі мүмкін.
