Zakon.kz ақпараттық порталының хабарлауынша, Еңбек және халықты әлеуметтік қорғау министрі мен Қаржы министрінің бірлескен бұйрығымен мемлекеттік кірістер органдарының Еңбек және халықты әлеуметтік қорғау министрлігіне салық құпиясын құрайтын салық төлеуші (салық агенті) туралы мәліметтерді ұсыну жөніндегі өзара іс-қимыл қағидалары бекітілді. Мемлекеттік кірістер органдары тарапынан ұсынылатын және салық құпиясын құрайтын ақпараттардың тізбесіне бюджетпен, сондай-ақ әлеуметтік төлемдер бойынша есеп айырысулардың жай-күйі (салық төлеушінің дербес шотынан үзінді көшірме), салық агенті аударған жеке табыс салығының сомасы мен белгілі бір кезеңдердегі (жарты жылдық, жыл) жұмыскерлердің саны, сонымен қатар жеке кәсіпкерлер мен жеке практикамен айналысатын тұлғалардың салық кезеңінде алған жиынтық жылдық табысы (түзетулер ескерілген) және өзге де мәліметтер кіреді. Құжатқа сәйкес, Еңбек және халықты әлеуметтік қорғау министрлігі алынған мәліметтердің толық құпиялылығын қамтамасыз етуге міндетті. Осы бірлескен бұйрық 2026 жылғы 12 шілдеден бастап қолданысқа енгізіледі, ал бұған дейін күшінде болған нормативтік құқықтық актілер өзгерістерге байланысты күшін жояды.
Еуразия24 пікірі:
Салық органдарының Еңбек министрлігіне ұсынатын мәліметтер тізімімен толық танысып шығуға кеңес береміз. Құжат мазмұнына қарағанда, азаматтар мен бизнестің қаржылық деректеріне мемлекеттік бақылауды цифрлық деңгейде күшейту көзделгендей әсер қалдырады. Бұл ретте ең алдымен туындайтын сұрақ – мұндай тәртіп салық және банк құпиясына қатысты талаптарды бұзбай ма? Заң тұрғысынан алғанда, бұзбайды. Өйткені Салық кодексінде салықтық ақпарат мемлекеттік органдардың заңмен белгіленген функцияларын орындауы үшін және бірлескен нормативтік актілер негізінде берілген жағдайда салық құпиясы мәртебесіне жатпайтыны көзделген. Банк құпиясына қатысты талаптар да өзгеріссіз қалады. Еңбек министрлігі азаматтардың банктік шоттарына тікелей қол жеткізе алмайды. Мұндай ақпарат бұрынғыдай Ұлттық банк, Қаржы нарығын реттеу және дамыту агенттігі мен Мемлекеттік кірістер органдарының құзыретінде сақталады. Іс жүзінде бұл құжат мемлекеттік органдар арасындағы ақпарат алмасу аясында салық деректерінің ашықтығын кеңейтеді. Мұның салық төлеушілер үшін салдары қандай болуы мүмкін? Бақылау күшейе түседі. Себебі құжаттың негізгі мақсаты – халықтың нақты табыстары туралы мәліметтерді неғұрлым толық көру мүмкіндігін қалыптастыру. Мәселен, атаулы әлеуметтік көмек тағайындау кезінде жүйе үміткердің жиынтық жылдық табысын автоматты түрде анықтай алады. Нәтижесінде әлеуметтік төлемдер алу үшін ұсынылатын шындыққа сәйкес келмейтін мәліметтерді анықтау жеңілдейді. Сонымен қатар Еңбек министрлігі жүктілік пен босануға байланысты төлемдердің, еңбекке уақытша жарамсыздық бойынша төлемдердің немесе жұмысынан айырылуына байланысты төленетін жәрдемақылардың көлемін жұмыс беруші аударған жеке табыс салығы мен міндетті зейнетақы жарналары туралы мәліметтермен салыстыра алады. Бұл өзгерістер бейресми еңбекақы төлеу тәжірибесіне де әсер етуі мүмкін. Өйткені министрлік әрбір қызметкер бойынша аударылған төлемдер мен жарналардың айлық және тоқсандық есебін көре алады.
