«Құрметті Қасым-Жомарт Кемелұлы! Мен, шахматтан халықаралық гроссмейстер Бибісара Асаубаева, бүгінгі таңда әлемдік рейтингтегі үздік шахматшылар тізімінде 5-орында тұрмын! Әлемнің үздік шахматшыларымен бәсекелесіп келемін, алдымда тек Қытай спортшылары ғана тұр! Сізге мемлекет басшысы ретінде көмек сұрап жүгініп отырмын. Бүгін ең беделді турнирлердің бірі — «Норвей чесс» (Norway Chess) аяқталды, мен мәреге бір тур қалғанда 1-орынды жеңіп алдым. Осынау маңызды жарыстың алдындағы дайындық жиындарын мен өзімнің жеке жүлделік қаражатыма және ата-анамның ақшасына өткіздім. Осы турнирдегі жаттықтырушылар мен аналитиктердің еңбекақысын әлі күнге дейін төлеген жоқпыз. (…) Мен жылдан-жылға қиындықтарға тап болып келемін — спорт министрлерімен өзара іс-қимыл жасау уақыт өткен сайын күрделеніп барады. Спорт министрлігі тарапынан шахматтан әлем чемпионатындағы жеңіс үшін берілетін сыйақы көлемі — олимпиадалық медаль үшін төленетін 250 000 доллар сыйақымен салыстырғанда, небәрі 2 000 долларды құрайды. (…) Сіздің атыңыздан 2025 жылғы 30 желтоқсанда шыққан Жарлықпен маған 2-дәрежелі «Барыс» ордені берілді. Спорт министрлігінің шақыртуымен мен бұл орденді алу үшін Астанаға үш рет ұшып келдім, бірақ әр кез министрліктің бастамасымен сапарым кейінге шегеріліп отырды. Орденді әлі күнге дейін алған жоқпын. Біз сәуір және мамыр айларында «E-өтініш» жүйесі арқылы Сіздің атыңызға үш хат жолдадық, алайда осы уақытқа дейін ешқандай жауап болған жоқ. Хаттардың көшірмесін министрдің WhatsApp желісіне де жібердік. Жауап орнына — үнсіздік. Алда үлкен жарыстар, оқу-жаттығу жиындары және ауқымды жұмыстар күтіп тұр… Мен не істеуім керек, Президент мырза?»
Еуразия24 пікірі:
Ербол Мырзабосыновтың ведомствосы кезекті рет ыңғайсыз жағдайға тап болды. Халықаралық гроссмейстер Бибісара Асаубаева мемлекет басшысына жүгініп, тіпті осыдан бір ай бұрын олимпиада чемпионы Михаил Шайдоров айтқан айыптаулардан да сорақысын алға тартты. Еске сала кетейік, мамыр айының соңында спортшы бес айға жуық уақыт бойы жалақы алмағанын көпшілікке жария еткен болатын. Сондай-ақ ол Туризм және спорт министрлігімен келісімшартқа әлі қол қойылмағанын, ал ведомствоның бұл құжатқа 2026 жылға арналған міндеттеме ретінде 2030 жылғы Олимпиадада медаль жеңіп алу талабын қосып үлгергенін айтқан еді. Ол кездегі туындаған дауды қоғамдық резонанс пен келіспеушіліктерді шұғыл реттеу шаралары ғана басып қалды. Енді, міне, Бибісара Асаубаева бейінді ведомство басшылығын қаржыландырудың кешіктірілуіне ғана емес, президенттен берілген орденді әлі күнге дейін табыстамай отырғаны үшін де ашық айыптады. Бұған жауап ретінде министрлік не істеп жатыр? Жақында ғана Шайдоровтың жағдайын түсіндірген дәл сол вице-министр Серік Жараспаев өте жедел әрекет етіп, Бибісара Асаубаеваның дайындығына 210 млн теңгеге дейін қаражат бөлінгенін мәлімдеді: «Бір спортшы үшін бұл ақша жоғары халықаралық деңгейде өнер көрсетуге кем дегенде жетуі тиіс». Ал орденге қатысты, марапаттау туралы жарлыққа қол қойылғанын, бірақ «спортшының тығыз кестесіне байланысты табыстау рәсімі әлі өтпегенін» айтып құтылды. Сонымен, бұл тартыста соңғы нүктені кім қояды?
