Prokadry.kz хабарлайды: Қазақстанда зейнетақы жинақтарын офтальмологиялық қызметтерге пайдалану жолы тоқтатылды. Бұл туралы «Отбасы банк» ресми түрде мәлімдеді. Банк өкілдерінің айтуынша, көз ауруларын емдеуге арналған өтінімдердің күмәнді түрде күрт өсуі бұл шешімге негіз болған. Мәселен, 15 қыркүйекке дейін ай сайын орта есеппен 174 өтінім мақұлданса, стоматологиялық қызметтер бойынша шектеу енгізілгеннен кейін бұл көрсеткіш бірден 1264-ке дейін артқан. «Атап айтқанда, әртүрлі клиенттерден бір офтальмологиялық клиникамен келісімшарт жасасқаны жөнінде өтінімдер түсті. Алайда құжаттарда әр түрлі қаладағы түрлі мекенжайлар көрсетілген. Жүргізілген тексеріс нәтижесінде көрсетілген мекенжайларда мұндай клиника тіркелмегені анықталды», – деп хабарлады банк. Соған қарамастан, зейнетақы жинағының артылған бөлігін өмірлік маңызы бар және қымбат ем түрлеріне пайдалану мүмкіндігі әлі де сақталып отыр. Атап айтқанда, орфандық (сирек кездесетін) ауруларды емдеу, қалпына келтіру және реконструктивті операциялар, радионуклидтік және радиоийодты терапия, радиохирургиялық емдеу, сондай-ақ протондық терапия шығындарын өтеу үшін қолдануға болады.
Евразия24 пікірі:
Зейнетақы қаражатын әлеуметтік мәселелерді шешуге пайдалануға мүмкіндік бар болған сайын, мұндай мәселелер қоғамда кең ауқымда пайда бола бермек. 2021 жылдан бері ақпараттық кеңістікте Бірыңғай жинақтаушы зейнетақы қорындағы (БЖЗҚ) қаражатты күмәнді жолмен шешіп алу деректері бойынша түрлі даулар жиі туындап келеді. Бұл жағдай тек тіс емдеумен шектелмей, пластикалық, реконструктивтік және қалпына келтіру операцияларына қатысты да байқалды. Мәселенің мәнісі – азаматтардың зейнетақы жинақтарын бастапқы мақсатына сай пайдаланбай, орынсыз жұмсауында ғана емес. Бұл үрдіс айналымға шығарылған миллиардтаған теңге арқылы инфляцияны одан әрі үдетіп отыр. Ақыр соңында мемлекет тарапынан күмәнді схемалар тоқтатылады. Алайда соның салдарынан шын мәнінде емделуге мұқтаж жандар қажетті көмекке қол жеткізе алмай қалады. Тағы бір маңызды аспект – бұл құбылыстың кейінге әсер ететін «баяу әсер ететін бомбаға» айналу мүмкіндігі. Яғни, бүгін зейнетақы активтерін мерзімінен бұрын шешіп алған азамат ертең зейнет жасына жеткенде күнкөріссіз қалуы ықтимал. Сол кезде жауапкершілік кімнің мойнында болады?
