Астана. 2 маусым. ИНТЕРФАКС-ҚАЗАҚСТАН – Қазақстан Премьер-министрі Олжас Бектенов Қытайдың Гонконг арнайы әкімшілік ауданы әкімшілігінің басшысы Джон Лимен сауда және жүк тасымалы салаларындағы ынтымақтастық мәселелерін талқылады. Бұл туралы Үкіметтің баспасөз қызметі хабарлады.
Тараптар көлік-логистикалық бағыттарды дамыту, инвестициялық ынтымақтастықты кеңейту, сондай-ақ цифрландыру, білім беру және туризм салаларындағы бірлескен жобаларды қарастырды.
Хабарламаға сәйкес, 2025 жылдың қорытындысы бойынша екі ел арасындағы өзара сауда көлемі 48,7 млрд АҚШ долларына жеткен. Ал Қазақстан мен Гонконг арасындағы тауар айналымы 40 пайызға өсіп, 180 млн долларды құрады.
«Гонконг Қазақстан үшін отандық өнімдерді Азия-Тынық мұхиты өңірінің нарықтарына шығарудағы маңызды көлік торабы болып табылады. Олжас Бектенов Гонконг пен Қытайдан Еуропалық одақ елдеріне жеткізілетін жүктерді әрі қарай тасымалдау үшін Қазақстан әуежайларының инфрақұрылымын пайдалануды ұсынды», – делінген хабарламада.
Екіжақты сауда байланыстарын дамыту мақсатында Қазақстан мен Қытай арасындағы экономикалық өзара іс-қимылдың перспективалы үлгісі ретінде «Қазақстан – Шыңжаң – Гонконг» форматы қаралды. Бұл ынтымақтастық тетігі пікір алмасу мен тауарлар мен қызметтердің ілгерілеуіне бағытталған бірлескен жобаларды іске асыруға арналған тұрақты алаң ретінде дамытылатын болады.
Гонконг әкімшілігінің басшысы келесі жылы гонконгтық әуе компаниясының Алматыға тікелей рейс ашуды жоспарлап отырғанын айтты. Тараптар алдағы уақытта Қазақстанмен әуе қатынастарының географиясы мен жиілігі кеңейе түсетінін атап өтті.
Джон Ли сондай-ақ Гонконг пен Қытайдың материктік бөлігіндегі іскер топтар Қазақстанды ынтымақтастықты дамыту және Орталық Азия нарығына шығу үшін маңызды серіктес ретінде қарастыратынын жеткізді.
«Бұл сапардың қорытындылары одан әрі ынтымақтастықтың зор әлеуетіне және “хабтан хабқа” әріптестік моделін дамыту перспективаларына деген сенімімізді нығайтты. Қазақстан Азия мен Еуропа арасындағы негізгі көлік-логистикалық бағыттардың тоғысқан жерінде орналасқандықтан, Орталық Азиядағы стратегиялық маңызы жоғары ел саналады. Тиімді бірлескен жұмыс жүргізуге мүмкіндік беретін көптеген бағыттар бар екеніне сенімдімін», – деді Джон Ли.
Бұған дейін хабарланғандай, Қазақстан транзиттік жүк тасымалы көлемін ұлғайтып, өз әуежайларын өңірлік авиациялық хабтарға айналдыруды мақсат етіп отыр. Мемлекет басшысының тапсырмасы бойынша қазақстандық авиациялық хабтардың тартымдылығын арттыру үшін елде авиаотын бағасы тоннасына 1200 доллардан 940 долларға дейін төмендетілді. Болашақта бұл көрсеткішті 890 долларға дейін азайту жоспарланған.
ҚазМұнайГаз-Аэро жетекші халықаралық жүк әуе тасымалдаушыларымен – Turkish Airlines, Turkish Cargo, FlyDubai, Red Sea, Air Cairo, Somon Air, FlyMeta және Silk Way West Airlines компанияларымен ұшақтарға тікелей жанармай құю жөнінде келісімге келді.
Сонымен қатар Cargolux Airlines International Қазақстанға рейстерін қайта бастады.
Бірыңғай әрі төмендетілген авиаотын бағасы Қазақстан әуежайларына Lufthansa, Emirates, Qatar Airways, Air China және әлемнің жетекші жүк тасымалдаушыларын тартуға мүмкіндік береді деп күтілуде.
