Астана. 2 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев инновациялық цифрлық қала – Alatau Smart City жобасы жүзеге асырылып жатқан Алматы облысында тұрғындар үшін қажетті базалық жағдайлардың жеткіліксіздігіне байланысты Үкіметтің жұмысын сынға алды.
«Қала құрамына қосылған елді мекендердің тұрғындары тұрақты интернеттің, сапалы жолдардың, орталықтандырылған сумен жабдықтау жүйесінің жоқтығын айтып отыр. Бұған қоса, электр энергиясының жиі өшірілетініне қатысты шағымдар да аз емес. Мұндай мәселелер облыстың барлық аумағында кездеседі», – деді Президент сейсенбі күні Алатау қаласын дамыту жөніндегі кеңесте.
Мемлекет басшысы қаланың жаңа аудандарында инженерлік инфрақұрылым тарту жұмыстары әлі күнге дейін жобалау кезеңінде тұрғанын атап өтті. Сондай-ақ үш қосалқы станцияны жаңғырту және су тарту нысанының қуатын арттыру жобалары белгіленген кестеден кешігіп жатқанын айтты.
«Alatau Smart City салу жөніндегі ауқымды міндеттер мен облыстағы нақты әлеуметтік-экономикалық ахуал арасында айқын алшақтық бар. Бұл туралы ашық айтуымыз керек. Мен бұл жағдайды Үкіметтің, атап айтқанда Премьер-министрдің орынбасары Қанат Бозымбаев пен облыс әкімі Марат Сұлтанғазиев тарапынан жіберілген олқылық деп санаймын», – деді Тоқаев.
