Астана. 23 қазан. ИНТЕРФАКС-ҚАЗАҚСТАН – Бейсенбі күні Қазақстан парламентінің Сенаты екі оқылымда қарап, «Әкімшілік құқықбұзушылық туралы кодекске (ӘҚБтК) өзгерістер мен толықтырулар енгізу туралы» заң жобасын өз түзетулерімен Мәжіліске кері қайтарды.
Құжатты палата отырысында таныстырған сенатор Бибігүл Аққожина атап өткендей, заңмен сауда қызметі, соның ішінде онлайн-сауда саласындағы әкімшілік құқықбұзушылық құрамдары нақтыланып, жасанды интеллект саласындағы құқықбұзушылықтар үшін жаңа жауапкершілік шаралары енгізіледі.
Атап айтқанда, заң энергетикалық сусындарды сатуға тыйым салу талабын бұзғаны үшін жауапкершілікті көздейді, сондай-ақ таңбаланған тауарлардың қадағалануын қамтамасыз ету мақсатында бақылау чегінде сәйкестендіру құралдарын міндетті түрде көрсету талабы енгізіледі.
Тұрғын үй құрылысына үлестік қатысу саласында – жеке және заңды тұлғалардан тиісті рұқсатсыз қаражат тартқаны үшін, сондай-ақ инженерлік желілер мен жабдықтарды жылыту маусымына дайындау іс-шараларын жүргізбегені үшін әкімшілік жауапкершілік белгіленеді.
Сенатор Аққожинаның айтуынша, заң жобасын екінші оқылымда талқылау барысында Сенат бірқатар түзетулер енгізген. Атап айтқанда, кәмелетке толмағандарға темекі өнімдерін сатқан жағдайда коммерциялық емес ұйымдарға әкімшілік жауапкершілік қарастырылып отыр. Бұған қоса, техникалық сипаттағы түзетулер де енгізілген.
