«Мені Ресейге өткізбей қойды», — деп хабарлады «Байтақ» жасылдар партиясының төрағасы Азаматхан Әміртаев өзінің әлеуметтік желідегі парақшасында. Алайда бұл жазбаны қазір көру мүмкін емес — оны уақытында оқып үлгеру керек еді. Қазіргі таңда Азаматханның Фейсбуктегі парақшасына сілтеме арқылы өтсеңіз, «бұл контент қолжетімді емес» деген жазу шығады. Дегенмен парақшаның өзі жұмыс істеп тұр. Жарияланымды біреудің нұсқауымен емес, автордың өзі жойды деп үміттенеміз.
Бұл ақпарат кейбір дереккөздерде әлі де сақталған. Мәселен, елордалық «ҚазТАГ» агенттігі оқиғаның егжей-тегжейлі нұсқасын ұсынды. Әрине, егер аталған материал жойылып кетпесе және оны оқып үлгерсеңіздер.
Көптеген сынақтардан өтіп, ысылып үлгерген «Орда» порталындағы дәл осы жаңалық әлеуметтік желідегі сол баяғы сілтемемен берілгенімен, қазір мұнда «парақша табылмады» деген жазу тұр. Алайда https://orda.kz/ сайты ақаусыз жұмыс істеп тұр.
Сақтық үшін өңірлік «Ақ Жайық» басылымына сілтеме бере кетейік. Онда «Байтақ» партиясы төрағасының парақшасындағы қазір қолжетімді емес контенттің мазмұны әлі де бар. Әрине, егер оқып үлгерсеңіздер.
Жалпы, қазақстандық «жасылдар» көшбасшысын Мәскеуге өткізбегені туралы ақпарат шетелдік басылымдарға да тарап кетті. Енді бүкіл контентті бірдей жойып жіберу мүмкін емес. Михаил Булгаковтың романында айтылғандай, «қолжазбалар жанбайды». Әсіресе, Интернет ғасырында бұл — айнымас шындық.
Дегенмен, Азаматхан Әміртаевтың бұл жағдайға қатты мазасызданғаны байқалады.
Бірақ бұған не себеп болды? Жағдай шынымен де түсініксіз: қазақстандық экологтардың көшбасшысы ресейлік экологиялық партиялардың форумына аттанып, бірақ кері қайтарылады. Азаматхан Әміртаев бұл жағдайға өзінің парақшасында шынайы таңданыс білдірді. Ол өзінің де, өзі басқаратын «Байтақ» партиясының да ниеті түзу екенін айтқан. Автор осындай достық ниеті мен таңданысын білдірген жазбасын өшіре отырып, достық пиғылынан бас тартпағанымен, өзіне көрсетілген «қонақжайлылықтың» себебін әлі де түсінбеген сыңайлы.
Ал бұл жаңалықтың ізі суымай тұрып зерттегендер «Байтақ» көшбасшысының бұған дейінгі айтқан сөздеріне қатысты пікірлерге кезіккен болуы мүмкін. Оның Ресейге кіре алмауына сол бұрынғы мәлімдемелері себеп болған сияқты.
Демек, Мәскеу қазақстандық саясаткерлердің сөзін мұқият қадағалап қана қоймай, оған жауап та қайтарады. Бар болғаны осы.
