ҚР Еңбек және халықты әлеуметтік қорғау министрлігінің хабарлауынша, Мемлекеттік әлеуметтік сақтандыру қорынан жұмысынан айырылған азаматтарға төленетін әлеуметтік төлемге қатысты Әлеуметтік кодекстегі негізгі өзгерістер 2027 жылғы 1 қаңтардан бастап күшіне енеді. Жұмысынан айырылған азамат алдымен жұмысқа орналасуға жәрдем алу үшін мансап орталығына жүгінуі қажет. Биылғы 1 қазаннан бастап «жұмыс іздеуші адам» мәртебесінде болу мерзімі 2 күннен 13 күнге дейін ұзартылды. Егер 13 күн ішінде лайықты жұмыс табылмаса, азаматқа ресми түрде жұмыссыз мәртебесі беріледі. Жұмыссыз мәртебесін алғаннан кейін әлеуметтік төлем тағайындауға өтінішті өзіңізге ыңғайлы тәсілмен беруге болады. Ол үшін eGov.kz электрондық үкімет порталын, Enbek.kz Электрондық еңбек биржасын немесе екінші деңгейлі банктердің мобильді қосымшаларын пайдалануға болады. 2027 жылдан бастап әлеуметтік төлем азаматтың жұмыс іздеп жүрген кезеңіне, әлеуметтік сақтандыру жүйесіне қатысу өтіліне қарай 3 айға дейін тағайындалады. Төлем мөлшері соңғы екі жылдағы орташа айлық табыстың 45 пайызын құрайды. Бұл ретте есепке алынатын табыс ең төменгі жалақының (ЕТЖ) 7 еселенген мөлшерінен аспауы тиіс. Маңызды! Бұрынғыдай, бұл әлеуметтік төлемді алуға тек міндетті әлеуметтік сақтандыру жүйесіне қатысқан азаматтардың ғана құқығы бар.
Еуразия24 пікірі:
Уақытша жұмыссыз қалған азаматтарға бұрынғы табысының жартысына жуығын алу мүмкіндігін беру – әлеуметтік қолдаудың тиімді тетігі. Алайда қазіргі бағаны ескерсек, айына 346,5 мың теңге, әсіресе балалары бар немесе ипотекалық несие төлеп отырған отбасылар үшін, айтарлықтай қомақты қаражат емес. Дегенмен үш айда бұл сома миллион теңгеден асады. Мұндай қаржылай қолдау азаматтарға жаңа жұмыс тапқанша күнкөрісін қамтамасыз етуге мүмкіндік береді.
Нақтылай кетейік, 346,5 мың теңге көлеміндегі төлемді жұмыссыз қалған қазақстандықтардың бәрі бірдей ала алмайды. Оған жұмыстан шыққанға дейін айына кемінде 770 мың теңге табыс тапқан және жұмыс берушісі Мемлекеттік әлеуметтік сақтандыру қорына (МӘСҚ) әлеуметтік аударымдар жасап отырған азаматтар ғана үміт арта алады.
Қалай болғанда да, әлеуметтік төлем жұмысқа орналасудың баламасына айналмауы тиіс. Сондықтан оны алу мерзімі үш айға дейін қысқартылды.
МӘСҚ мәліметінше, 2026 жылдың қаңтар–тамыз айларында Қазақстанда жұмысынан айырылуына байланысты 314,4 мың адамға жалпы сомасы 101 млрд теңге әлеуметтік төлем берілген. Бір адамға төленетін орташа сома 102,3 мың теңгені құрайды. Бұл белгіленген ең жоғары мөлшерден едәуір төмен.




