ҚР Денсаулық сақтау министрлігі ресми түрде мәлімдейді: «Әлеуметтік желілерде таралған «арзан вакциналар сатып алынып, балалардың ауруына себеп болып жатыр» деген мазмұндағы ақпарат шындыққа сәйкес келмейді. Бұл жалған ақпарат Нархоз университетінің профессоры ретінде ұсынылған Күлзада Абдрахманқызы Әбенованың журналист Айнұр Асанберді жүргізген «Әңгіме бар» подкастындағы сұхбатына қатысты таралған. Республика аумағында Ұлттық профилактикалық екпе күнтізбесіне сәйкес қолданылатын барлық вакциналар халықаралық және ұлттық сараптаманың бірнеше кезеңінен өтеді, Дүниежүзілік денсаулық сақтау ұйымының (ДДҰ) талаптары мен ұлттық заңнамаға сәйкес тіркеуден өтіп, қолдануға рұқсат беріледі. Вакциналарды сатып алу барысында негізгі назар олардың сапасы, қауіпсіздігі мен тиімділігіне аударылады. «Арзандығы» вакциналарды таңдау өлшемшарты болып табылмайды. Сатып алу кезінде келесі талаптар ескеріледі: ДДҰ преквалификациясының немесе қатаң реттеу жүйесі бар елдерде тіркелгендігі, клиникалық зерттеулер нәтижелері, халықаралық GMP (жақсы өндірістік тәжірибе) стандарттарына сәйкестігі, тіркеуден кейінгі қауіпсіздік мониторингі деректері. «Вакциналар балаларда ауру тудырады» деген пікірлердің ешқандай ғылыми дәлелі жоқ және бұл ДДҰ мен өзге де халықаралық ұйымдардың көпжылдық зерттеулеріне қайшы келеді.
Керісінше, вакцинация әлемде қауіпті инфекциялық аурулардан сырқаттану мен өлім-жітімді айтарлықтай азайтып, мыңдаған ауыр асқынулар мен өлім жағдайларының алдын алды».
Евразия24 пікірі:
Қазақстан Республикасы Денсаулық сақтау министрлігіне денсаулық сақтау саласындағы түрлі мәселелерге байланысты сын жиі айтылады. Медициналық сақтандыру жүйесіне қатысты үздіксіз реформалар, қызмет көрсету сапасы, әсіресе ауылдық жерлердегі медициналық көмектің қолжетімділігі – көпшіліктің алаңдаушылығын тудыратын бағыттар. Алайда вакцинация арқылы басқарылатын вирустарға қарсы екпелерді жүргізу ісінде бұл жүйе ондаған жылдар бойы нақты әрі тиімді жұмыс істеп келеді. Бұл салада жылдар бойы қалыптасқан тәжірибе мен нақты нәтижелер бар. Алайда, вакцинацияға қарсы пікірлерді қарапайым азаматтар емес, кәсіби медицина қызметкерлері ашық білдіре бастаған жағдайда, бұл қоғамда антивакциналық көзқарастың ушығуына ықпал етеді. Соңғы жылдары елімізде мұндай үрдіс анық байқалып отыр және оның салдары да жоқ емес. 2023 жылы елімізде соңғы он жылдағы ең ірі қызылша індеті тіркелді. Денсаулық сақтау министрлігінің деректеріне сәйкес, сырқаттанған 30 мыңға жуық адамның 80%-ын 14 жасқа дейінгі балалар құрады, олардың көпшілігі алдын ала екпе алмаған. Екпеден бас тарту немесе жоспарлы вакцинациядан жалтарудың себептері – көбіне негізсіз, ғылыми дәлелге сүйенбейтін пікірлер. Көптеген азаматтар интернеттен алынған, ғылыми негізі жоқ ақпаратқа сеніп, мысалы, вакцинаның аутизммен байланысы туралы баяғыда жоққа шығарылған жалған ақпаратқа иек артады. Мұндай шешімдер өз денсаулығына ғана емес, балалардың өміріне де қауіп төндіріп, ұжымдық иммунитет деңгейінің төмендеуіне себеп болады. Осыған байланысты халық арасында түсіндіру жұмыстарын күшейту – бүгінгі күннің маңызды міндеті. Емделушілер тарапынан сенім аз болғанына қарамастан, профилактикалық екпенің пайдасы туралы нақты және дәйекті ақпаратты ұдайы жеткізу қажет.
