Астана. 25 тамыз. ИНТЕРФАКС-ҚАЗАҚСТАН – Құрылтайға өту үшін белгіленген 5 пайыздық межеден бес партия өтті. Сайлауда «Әділет» партиясы айқын басымдықпен жеңіске жетті, деп хабарлады Орталық сайлау комиссиясының төрағасы Нұрлан Әбдіров.
Сайлаудың түпкілікті қорытындысы бойынша «Әділет» сайлаушылардың 71,17%-ының дауысын жинап, Құрылтайдағы 110 мандатқа ие болды, деді Әбдіров сейсенбі күнгі брифингте.
«Ауыл» партиясын сайлаушылардың 6,26%-ы қолдап, партияға 10 мандат берілді. Respublica 5,56% дауыс жинап, Құрылтайдағы 9 орынға ие болды.
«Ақ жол» демократиялық партиясы 5,21%, Жалпыұлттық социал-демократиялық партия 5,11% дауыс жинады. Екі партияға да Құрылтайдан 8 мандаттан берілді.
Қазақстан Халық партиясы мен «Байтақ» жасылдар партиясы Құрылтайға өте алмады. Қазақстан Халық партиясы 3,11%, ал «Байтақ» сайлаушылардың 1,07%-ының дауысын алды.
Дауыс беруге қатысқандардың 2,51%-ы «барлығына қарсымын» нұсқасын таңдады.
Қазақстанда жексенбі күні жаңа бір палаталы парламент – Құрылтай депутаттарының алғашқы сайлауы өтті. Дауыс беру 10,4 мыңнан астам сайлау учаскесінде ұйымдастырылды. Оның 79-ы Қазақстанның 61 мемлекеттегі шетелдік өкілдіктері жанынан ашылды. ОСК-ның алдын ала мәліметі бойынша, сайлауға қатысу көрсеткіші 74,08% болды.
Сайлауға жеті саяси партиядан барлығы 545 кандидат тіркелді. Оның ішінде «Әділеттен» – 186, «Ақ жолдан» – 63, «Ауылдан» – 69, «Байтақтан» – 47, Қазақстан Халық партиясынан – 72, Жалпыұлттық социал-демократиялық партиядан – 33 және Respublica партиясынан 75 кандидат ұсынылды.
Бұған дейін Парламенттің төменгі палатасы – Мәжілісте алты партия өкілдері болған. Онда «Аманат» партиясы басым саяси күш еді. Кейін ол «Әділет» партиясының құрамына енді. Сондай-ақ Мәжілісте «Ауыл», «Ақ жол», Respublica, Жалпыұлттық социал-демократиялық партия және Қазақстан Халық партиясы болды.
Сайлауда ең көп дауыс жинаған «Әділет» партиясын бастамашыл топ 2026 жылдың сәуірінде құрды. Мамыр айының басында Қазақстан Президенті Әкімшілігінің бұрынғы басшысы Айбек Дәдебай партия төрағасы болып сайланды. Маусымда партия мемлекеттік тіркеуден өтті. Сол айдың ортасында өткен съезд шешімімен елдегі ең ірі билеуші партия «Аманат» «Әділеттің» құрамына қосылды. «Аманат» бұған дейін «Нұр Отан» деп аталған және Қазақстанның бұрынғы президенті Нұрсұлтан Назарбаевтың партиясы болған.
Қазақстанда заң шығару билігін жүзеге асыратын жоғары өкілді орган – Құрылтай алғаш рет сайланды. Бұған дейін елде Мәжіліс пен Сенаттан тұратын екі палаталы Парламент жұмыс істеді.
Құрылтай 145 депутаттан тұрады. Депутаттар бірыңғай жалпыұлттық сайлау округінде партиялық тізімдер бойынша пропорционалды жүйемен сайланды. Сайлау жалпыға бірдей, тең және төте сайлау құқығы негізінде жасырын дауыс беру арқылы өтті.
