Мәскеу. 25 тамыз. ИНТЕРФАКС – «Роскосмос» пен NASA Халықаралық ғарыш станциясының (ХҒС) жұмысы аяқталғаннан кейінгі бірлескен жобаларды талқылады. Келіссөз барысында тараптар ғарыш техникасына қатысты бірқатар техникалық мәліметпен өзара бөліскен. Бұл туралы «Роскосмос» мемлекеттік корпорациясының басшысы Дмитрий Бақанов хабарлады.
«Алдағы жоспарларды талқыладық. Біз ғарыш техникамыздың кейбір техникалық сипаттамаларын ұсындық, олар да өз мәліметтерімен бөлісті. Сондықтан Халықаралық ғарыш станциясының жұмысы аяқталғаннан кейін де Жер маңындағы орбитада ынтымақтастықты жалғастыруымыз мүмкін», – деді Бақанов «Юнашев Live» арнасына берген сұхбатында.
Оның айтуынша, ХҒС-ты пайдалану мерзімін ұзарту туралы ұсынысты АҚШ тарапы жасаған, ал Ресей бұл бастаманы қолдаған.
«ХҒС-та екі тараптың бір-бірінсіз жұмыс істей алмайтынын түсіну өте маңызды. Біз өзара көмектесуіміз керек. Төтенше жағдай туындаса, бір тарапқа көмекке келе алатын ең алдымен оның серіктесі», – деді «Роскосмос» басшысы.
Бақанов ХҒС-ты бірегей ғарыш кешені деп атады. Станцияда Ресей мен АҚШ ғарышкерлерінің бір-бірінің кемелерімен ұшу тәжірибесі қалыптасқан. Алдағы уақытта тараптар мұнда тағы бірнеше бірлескен тәжірибе өткізуді жоспарлап отыр.
14 шілдеде Бақанов «Роскосмос» пен NASA ХҒС жұмысын 2030 жылға дейін жалғастыру жөнінде келіскенін хабарлаған.
Сонымен қатар Байқоңырда Дмитрий Бақанов, Ресей премьер-министрінің бірінші орынбасары Денис Мантуров және NASA басшысы Джаред Айзекман келіссөз өткізді. Бұған дейін Ресей мен АҚШ Халықаралық ғарыш станциясының жұмысын 2030 жылдың соңында бірлесіп аяқтау жоспарын әзірлегені хабарланған.
