Вашингтон. 25 тамыз. ИНТЕРФАКС – Канада премьер-министрі Марк Карни сейсенбі, 25 тамызда АҚШ тауарларына жауап ретінде баж енгізілетінін жариялауы мүмкін. Бұл туралы дереккөзге сілтеме жасаған Associated Press хабарлады.
Агенттік дерегінше, Канада жаңа баждар туралы шешімін сейсенбі күні жарияламақ.
Бұған дейін Карни АҚШ-тың әрбір сауда шектеуіне дәл сондай көлемде жауап берілетінін мәлімдеген еді.
Алайда дүйсенбі күні премьер-министр Канада жауап шараларын қабылдағанда «долларға – доллар» қағидатын ұстанбауы мүмкін екенін айтты. Оның орнына нақты тауарлар мен салаларға бағытталған шаралар қарастырылып жатыр. Карнидің айтуынша, үкімет үшін ең бастысы – канадалық жұмысшылар мен бизнестің мүддесін қорғау.
Сол күні АҚШ президенті Дональд Трамп 2027 жылғы 1 қаңтардан бастап Канадада шығарылған жеңіл және жүк көліктеріне, автокөлік бөлшектері мен болатқа 50 пайыздық баж енгізілетінін мәлімдеді.
Трамп Канаданы АҚШ үшін сауда қатынасын жүргізу ең қиын елдердің бірі деп атады. Оның айтуынша, Оттаваның америкалық ауыл шаруашылығы өнімдеріне салған баждары салдарынан АҚШ-тың Канадамен саудадағы тапшылығы 60 млрд долларға жеткен. Сондай-ақ ол Канаданың АҚШ-қа тәуелділігі әлдеқайда жоғары екенін айтып, канадалық бизнестің 95%-ы АҚШ-пен байланысты екенін мәлімдеді.
АҚШ пен Канада өткен жұмаға дейін жаңа сауда шарттары жөнінде ортақ мәмілеге келе алмады. Соның нәтижесінде сенбі күні жалпы құны 20 млрд доллар болатын бірқатар канадалық тауарға, соның ішінде сыра мен ірімшікке АҚШ-тың 50 пайыздық бажы күшіне енді.
АҚШ-тың сауда өкілі Джеймисон Грир Канаданың келісуге аз қалған мәміледен бас тартқанын мәлімдеді. Ал АҚШ көлік министрі Шон Даффи Оттаваның сауда текетіресіне баруын үлкен стратегиялық қателік деп бағалады.
Марк Карни бұған дейін Вашингтон келіссөз аяқталар тұста талаптарын өзгерткенін айтқан. Ол АҚШ-тың бұл әрекетін әділетсіз әрі экономикалық тұрғыдан негізсіз деп бағалап, мұндай жағдайда кез келген келісімнің сенімділігіне күмән туатынын мәлімдеген.
