Әзербайжан мен АҚШ стратегиялық әріптестік хартиясын дамыту мақсатында Өзара түсіністік туралы меморандумға және үш бағыт бойынша ынтымақтастықты қамтитын Стратегиялық жұмыс тобын құру жөніндегі келісімге қол қояды. Әзербайжанның АПА агенттігінің хабарлауынша, құжатқа қол қою рәсімі президент Ильхам Әлиевтің АҚШ-қа жұмыс сапары аясында Вашингтон қаласында өтеді.
Стратегиялық әріптестіктің негізгі бағыттары – өңірлік байланыстар (энергетика, сауда және транзит), инвестициялар (жасанды интеллект пен цифрлық инфрақұрылым) және қауіпсіздік саласындағы ынтымақтастық (қорғаныс саласындағы келісімдер және терроризмге қарсы іс-қимыл). Жұмыс тобы өңірлік байланыстар мен энергетика секторына инвестиция тарту инфрақұрылымын кеңейту, өңірлік экономикалық және сауда ынтымақтастығын ілгерілету, сондай-ақ жасанды интеллектті дамыту мәселелерімен айналысады.
«Әзербайжан мен АҚШ арасындағы стратегиялық әріптестік – бұл біздің елге америкалық технологиялар мен инвестицияларды тарту, сондай-ақ АҚШ-тың экономикалық белсенділігін арттыруды білдіреді», – деп мәлімдеді агенттік дереккөзі.
Бұған дейін хабарланғандай, Әлиев қазір АҚШ-та жұмыс сапарымен жүр. 8 тамызда Әзербайжан президенті АҚШ президенті Дональд Трамппен және Армения премьер-министрі Никол Пашинянмен кездеседі.
