Нью-Йорк. 16 қазан. ИНТЕРФАКС – Алтын бағасы бейсенбі күні тарихи максимум деңгейіне жетіп, қатарынан бесінші сауда сессиясында өсім көрсетуде.
Бейсенбі күнгі саудада алтынның спот бағасы 0,6%-ға өсіп, бір унциясы $4233,06-ға жетті. Бұған дейінгі сессия барысында бағасы $4241,77-ге дейін көтеріліп, рекорд жаңартты.
Желтоқсан айындағы фьючерстер құны 1,1%-ға өсіп, бір унциясы $4246,6 болды.
АҚШ президенті Дональд Трамп 1 қарашадан бастап Қытайға қарсы 100%-дық кедендік баж салығы енгізілетінін мәлімдеді. Ол бұл шешімді Қытайдың 1 қарашадан бастап елде өндірілетін тауарлардың басым бөлігіне экспорттық бақылау шараларын енгізетінімен түсіндірді.
Сонымен қатар, АҚШ-тың сауда өкілі Джеймисон Грирдің мәлімдеуінше, егер Қытай сирек кездесетін металлдар экспортына шектеу қойса, бұл екі ел арасындағы қолданыстағы сауда келісімдеріне қайшы келеді, деп жазады Axios басылымы.
«АҚШ президенті Дональд Трамп өз позициясын түбегейлі өзгертіп, бұл жағдайды нақты сауда соғысы деп атады. Бұл алтын үшін елеулі серпін беріп отыр», – деді OANDA компаниясының аға сарапшысы Кайл Родда.
АҚШ Қаржы министрлігінің өкілі сәрсенбі күні екі аптаға созылатын шатдаун ел экономикасына аптасына $15 млрд көлемінде шығын келтіруі мүмкін екенін хабарлады. Сонымен қатар, инвесторлар келесі Федералдық резерв жиынында базалық мөлшерлеме 25 базистік пунктке төмендейді деп дерлік сенімді. Желтоқсанда тағы бір рет төмендету болжанып отыр.
ANZ сарапшыларының болжамынша, жыл соңына дейін алтын бағасы $4400-ге дейін көтерілуі мүмкін.
Жыл басынан бері бағалы металл 60%-дан астамға қымбаттады.
