Вашингтон. 22 шілде. ИНТЕРФАКС – Ақ үй жұма күні ондаған елден әкелінетін тауарларға жаңа кедендік баж енгізуді жоспарлап отыр. Бұған аталған елдерде өндіріс барысында мәжбүрлі еңбек қолданылатыны негіз ретінде алынбақ. Бұл туралы Bloomberg агенттігі дереккөздерге сілтеме жасап хабарлады.
Агенттік мәліметінше, АҚШ президенті Дональд Трамп әлемдік деңгейде енгізілген 10 пайыздық тарифтің қолданылу мерзімі аяқталғаннан кейін де кедендік тариф режимін сақтап қалу үшін жұмаға дейін ондаған елдің өніміне жаңа баж салығын енгізуді көздеп отыр.
Биыл ақпанда АҚШ Жоғарғы соты көпшілік дауыспен Трамптың 2025 жылы әлемнің көптеген елдерінің тауарына баж салығын енгізу туралы шешімін заңсыз деп таныған болатын. Бұған жауап ретінде Трамп барлық елден келетін импортқа салынатын баж мөлшерлемесін уақытша 10 пайызға дейін көтеру жөнінде шешім қабылдады. Бұл шараның мерзімі осы жұмада аяқталады.
Дереккөздердің айтуынша, жаңа тарифтердің бұрынғы 10 пайыздық мөлшерлемеден өзгеше болатыны әзірге белгісіз. Сонымен қатар Ақ үйдің бұл жоспары түпкілікті бекітілмеген және өзгеруі мүмкін.
Сейсенбі күні АҚШ-тың Сауда өкілі Джеймисон Грир жаңа баж салығының енгізілетіні сөзсіз екенін мәлімдегенімен, оның нақты тетіктеріне тоқталған жоқ.
Бұған дейін АҚШ Сауда өкілінің басқармасы мәжбүрлі еңбек қолданылатынын алға тартып, Канада, Мексика және Еуропалық одақтан импортталатын өнімдерге 10 пайыздық, ал Қытай, Үндістан және Жапониядан келетін тауарларға 12,5 пайыздық баж салығын енгізуді ұсынған еді.
Бұдан бөлек, АҚШ әкімшілігі бірқатар елдерді өндірістік қуатты шамадан тыс пайдалануда деп айыптап, тағы бір кедендік баж енгізуді көздеп отыр. Алайда Bloomberg мәліметінше, бұл бағыттағы тексерулер әлі жалғасып жатқандықтан, мұндай тарифтер осы жұмаға дейін күшіне енбейді.
Бұған дейін Financial Times газеті дереккөздерге сілтеме жасап, Трамптың кеңесшілері аралық сайлау қарсаңында сауда соғысының жаңа кезеңі АҚШ экономикасына кері әсер етуі мүмкін екенін ескертіп жатқанын хабарлаған.
