Вашингтон. 2 желтоқсан. ИНТЕРФАКС – Politico басылымының дереккөздерге сілтеме жасай отырып хабарлауынша, АҚШ билігі Еуропалық Одақтың санкциялар жөніндегі арнайы өкілі Дэвид О’Салливанға Украина бойынша келісімге қол қойылғаннан кейін Ресей Федерациясының бұғатталған активтерін қайтаруды жоспарлап отырғанын мәлімдеген.
«О’Салливан мырзаның осы жазда Вашингтонға сапары барысында америкалық шенеуніктер АҚШ жоспарының келісім жасалғаннан кейін Ресейге оның бұғатталған активтерін қайтаруды көздейтінін нақты түрде жеткізді», – деп жазады портал.
Politico мәліметінше, АҚШ-тың бастапқы бейбіт жоспарының жобасында Ресейдің бұғатталған активтерінің 100 млрд долларға дейінгі бөлігін Украинаға көмек көрсетуге және оның экономикасына инвестиция тартуға бағыттау ұсынылған. Бұл бастама АҚШ-тың жетекшілігімен жүзеге асырылуы көзделген.
Алайда бұл шарт ЕО елдері арасында алаңдаушылық тудырған. Атап айтқанда, дереккөздердің айтуынша, «бұғатталған қаражаттың белгілі бір бөлігін АҚШ өз меншігіне айналдырып жіберуі және қалған бөлігін Ресеймен бөлісуі мүмкін» деген қауіп болған.
Бұған дейін Еуропалық комиссия Брюссельдегі Euroclear қаржы депозитарийінде сақтаулы тұрған, құны шамамен 170 млрд еуроны құрайтын Ресейдің бұғатталған активтерін пайдаланудың мүмкін жолдарын қарастырып жатқаны хабарланған. Оның ішінде 140 млрд еуроны Украинаға «репарациялық несие» түрінде беру ұсынылған. Алайда Бельгия бұл шешімнің заңдық және қаржылық салдарларына алаңдап, бастамаға қарсы шыққан. Елдің премьер-министрі Барт де Вевер бұл шешімді жүзеге асыру үшін ЕО тарапынан қосымша, заңды міндеттейтін кепілдіктерді талап еткен.
Сейсенбі күні Financial Times басылымы өз дереккөздеріне сілтеме жасай отырып, Еуропалық орталық банк Украинаға репарациялық несие беру аясында кепілдік беруші тарап болудан бас тартқанын хабарлады.
Аталған мәселе – Украинаға қаржылық қолдау көрсету – Еуроодақтың 18 желтоқсанға жоспарланған саммитінде талқылануы тиіс.
