Гонконг. 2 желтоқсан. ИНТЕРФАКС – South China Morning Post газетінің хабарлауынша, Қытайдың жағалау күзеті Шығыс Қытай теңізінде орналасқан даулы Дяоюйдао аралдары (Жапонияда — Сенкаку) маңында жапондық балық аулау кемесін кері қайтарғанын мәлімдеді.
«Дяоюйдао аралдары және оған іргелес жатқан шағын аралдар – Қытай аумағының ажырамас бөлігі. Біз Жапонияны осы теңіз аймағындағы кез келген заңсыз әрекетті және арандатушылықты дереу тоқтатуға шақырамыз», — деді Қытай жағалау күзетінің өкілі Лю Дэцзюнь.
Оның айтуынша, шекарашылар тиісті бақылау шараларын қолданып, жапон кемесіне ескерту жасаған. Лю Дэцзюнь Қытай жағалау күзетінің бұл аймақта патруль жүргізуді жалғастыратынын және елдің теңіздегі егемендігі мен құқықтарын қорғауға күш салатынын айтты.
Өз кезегінде Жапонияның жағалау күзеті Қытайдың екі кемесін ұстап, олардың жапон балық аулау кемесіне жақындауына жол бермегенін хабарлады.
Жапония мен Қытай арасындағы қарым-қатынас Шығыс Қытай теңізіндегі, қазіргі таңда Токио бақылауындағы Дяоюйдао (Сенкаку) аралдарына қатысты территориялық даумен күрделене түскен. Дағдарыс Жапония үкіметі 2012 жылдың қыркүйегінде аталған аралдарды жеке жапон иесінен сатып алғаннан кейін шиеленісе түсті. Қытай кемелері бұл аймаққа жиі жақындайды. Аралдар тобы Тайваньнан шығысқа қарай шамамен 170 шақырым және Окинавадан батысқа қарай 410 шақырым жерде орналасқан.
Аталған қақтығыс Қытай мен Жапония арасындағы соңғы апталарда ушығып кеткен шиеленістің аясында орын алды. Бұған себеп — Жапонияның премьер-министрі Санаэ Такаити парламентте сөйлеген сөзінде Қытай Тайваньға шабуыл жасайтын болса, Токио тарапынан әскери жауап беру ықтималдығын жоққа шығармағаны болды. Бұл мәлімдемеден кейін Бейжің жапон билігінен өз ұстанымын қайта қарауды талап етті, алайда Такаити өз пікірінен бас тартқан жоқ.
