Астана. 23 маусым. ИНТЕРФАКС-ҚАЗАҚСТАН – Қазақстан Премьер-министрі Олжас Бектенов Қытайға жасаған сапары барысында ҚХР Мемлекеттік кеңесінің Премьері Ли Цянмен сауда-экономикалық ынтымақтастықты дамыту мәселелерін талқылады. Бұл туралы Қазақстан Үкіметінің баспасөз қызметі хабарлады.
Тараптар сауда байланыстарын дамыту, инвестициялық ынтымақтастықты кеңейту, агроөнеркәсіптік кешен, көлік және логистика салаларындағы өзара іс-қимылды тереңдету сияқты бағыттарды қамтитын қазақ-қытай ынтымақтастығын одан әрі нығайтудың перспективаларын қарастырды.
Олжас Бектенов екі ел арасындағы қарым-қатынастар жан-жақты стратегиялық серіктестік рухында дамып келе жатқанын атап өтті.
«Қазақстан мен Қытайды өзара құрмет пен қолдауға негізделген ұзақ жылғы достық пен ынтымақтастық байланыстырады. Қазіргі таңда екіжақты қатынастар мәңгі әрі жан-жақты стратегиялық серіктестік рухында дамып, жаңа «алтын отызжылдық» кезеңіне қадам басты», – деп келтіреді Үкіметтің баспасөз қызметі Бектеновтің сөзін.
Өз кезегінде Ли Цян стратегиялық ықпалдастықтың жоғары деңгейін атап өтіп, екіжақты қатынастарды одан әрі нығайтуға дайын екенін білдірді. Оның айтуынша, Қытай тарапы саяси өзара сенімді нығайтуға, даму стратегияларын үйлестіруге және көпбағытты ынтымақтастықты кеңейтуге әзір.
Баспасөз қызметінің мәліметінше, 2025 жылдың қорытындысы бойынша Қазақстан мен Қытай арасындағы тауар айналымы 48 млрд доллардан асты. Ал Қытайдан тартылған тікелей инвестициялар көлемі 2,8 млрд долларды құрады.
