Брюссель. 17 шілде. INTERFAX – Еуропалық одақ кеңесі жұма күні Ресейдің әскери-өнеркәсіптік кешеніне кіретін бір жеке тұлға мен бес ұйымға қатысты шектеу шараларын енгізу туралы шешім қабылдағанын мәлімдеді.
ЕО кеңесінің хабарламасында аталған бес ұйымның барлығы ұшқышсыз ұшу аппараттарын қолдануға қажетті электрондық және радиоэлектрондық компоненттерді әзірлеп, өндіретін «АБС Электро» компаниялар тобының құрамына кіретіні айтылған.
Санкциялар тізіміне «АБС Электро» компаниялар тобы басқармасының төрайымы әрі осы топқа қарасты бірнеше компанияның директоры Ирина Харисова да енгізілді.
«Бүгін қабылданған санкциялық шешімдер Украинаның аумақтық тұтастығына, егемендігі мен тәуелсіздігіне нұқсан келтіретін немесе оған қауіп төндіретін әрекеттерге байланысты енгізілген шектеу шаралары аясында қабылданды», – делінген Брюссель таратқан хабарламада.
Аталған санкциялық тізімге енгізілген жеке және заңды тұлғалардың активтері бұғатталады. Сондай-ақ оларға тікелей немесе жанама түрде қаржы қаражатын не экономикалық ресурстар беруге тыйым салынады. Бұдан бөлек, санкция салынған жеке тұлғаларға Еуропалық одақ аумағына кіруге де шектеу қойылады, деп еске салды ЕО кеңесі.
Тиісті құқықтық актілер 17 шілдеде Еуропалық одақтың Ресми журналында жарияланды. Кеңестің қаулысы жарияланған күннен бастап күшіне енді.
